प्रदेशमे ३३६ संक्रमित ठपेबेर २३९ चोखैलै
पहुरा समाचारदाता
धनगढी, १६ माघ । सुदूरपश्चिम प्रदेशमे ३ सय ३६ जाने कोरोना भाइरसके संक्रमित ठपेबेर २ सय ३९ जाने चोखाइल बटै ।
सामाजिक विकास मन्त्रालय सुदूरपश्चिम प्रदेश स्वास्थ्य निर्देशनालयसे डेहल जानकारी अनुसार एक हजार २ सय ९४ जानेक कोरोना परिक्षण करेबेर ३ सय ३५ जनहनमे संक्रमण पुष्टि हुइल हो ।
एन्टीजेन विधिसे १ हजार २ सय २४ जानेक परिक्षण करेबेर २ सय ९४ जनहनमे ओ ६९ जानेक आरटी पीसिआर विधिसे परिक्षण करेबेर ४२ जनहनमे संक्रमण डेखल मन्त्रालय जनैले बा । ओस्टेक पछिल्का २४ घण्टामे दुई जाने कोरोना संक्रमितके ज्यान गैल बा ।
मृत्यु हुइलमे कैलालीके गौरीगंगा नगरपालिका–८ के ६५ बरसके एक महिला ओ कञ्चनपुरके कृष्णपुर नगरपालिका–१ के ३५ बरसके एक पुरुष रहल बटै । यिहे अवधिमे २ सय ३९ जाने चोखाइल बटै । कलेसे शनिच्चरके रोज २ सय ६९ जनहनमे कोरोना संक्रमण पुष्टि हुईबेर यिहे अवधिमे २ सय ९९ जाने चोखाइल रहिट । प्रदेशमे १ हजार ७ सय ८३ जाने आरटी पीसिआरके ओ २ हजार ९ सय ६० करके ४ हजार ७ सय ४३ जाने सक्रिय संक्रमित रहल बटै । अँटवारके सुदूरपश्चिम प्रदेशके टमान नाकासे ६ सय ६६ जाने नेपाल भिटरेबेर ४७ जनहनमे संक्रमण पुष्टि हुइल बा ।
ओस्टेक करके देशभर अँटवार थप ३ हजार ५४० जनहनमे कोरोनाभाइरसके संक्रमण पुष्टि हुइल बा । १३ हजार १४५ जानेक कोरोना परीक्षण करेबेर पीसीआर विधिसे ३ हजार ४९ तथा एन्टिजेन विधिसे ४९१ जनहनमे संक्रमण पुष्टि हुइल हो ।
यिहे अवधिमे ६ हजार ३५९ जाने संक्रमणमुक्त हुइल बटै । यहोर, मृतकके संख्यामे ३२ जाने थप हुइल बटै । यी मन्से वीरेन्द्र अस्पताल ढिला करके १२ जानेक मृत्युके रिपोर्ट डेहल हो कलेसे बाँकी २० जाने टमान अस्पतालसे १३ से १६ गतेसम प्राप्त हुइल तथ्यांक हो । हाल देशभर ८३ हजार ९९९ जाने सक्रिय संक्रमित रहल बटै ।
