कुछ दिन मौसम सुधार नैहुइना

पहुरा समाचारदाता
धनगढी, १६ माघ । पश्चिमी न्यून चापीय प्रणालीके प्रभावसे अभिन कुछ दिन मौसम सुधार नहुइना हुइल बा ।

उ मौसमी प्रणालीके कारण कुछ दिन देशके अधिकांश भूभागमे आंशिकसे सामान्य बदली हुके कुछ स्थानमे हल्का वर्षा ओ हिमपातके सम्भावना रहल मौसम पूर्वानुमान महाशाखा जनैले बा ।

शनिच्चरके रोज कैलालीमे घाम डेखेलेसेफे अँटवार रोज अधिक जार करलपाछे जनजीवन प्रभावित बनल बा । कोरोना टिसराके संक्रमण बह्रटी गैलबेला जार बह्रलपाछे मौसमी सरदीखोकीसे समस्याफे डेखल बा ।

अँटवारके रोज सपसपटी शित बरसलपाछे जारके बाँचेक लाग धनगढीके स्थानीय ठाउँ ठाउँमे आगी सुल्गाके आगी टापके बैठल रहिट ।

अँटवार सबसे कम जुम्लाके न्यूनतम तापक्रम माइनस ३.७ डिग्री ओ सबसे ढेर दिपायलके अधिकतम तापक्रम २१ दशमलव ६ डिग्री सेल्सियस रहल बा ।