भुईयाँफाँटाके भलमन्सामे फेनसे दुलारे
पहुरा समाचारदाता
धनगढी, १७ माघ । कैलालीके कैलारी गाउँपालिका–७, भुईयाँफाँटा गाउँके भलमन्सामे फेनसे दुलारेलाल चौधरी चयन हुइल बाटै ।
सोम्मारके हुइल उ गाउँके खोज्नीबोज्नी (भेला) से एक बरसके लाग फेनसे चौधरीहे सर्वसम्मतसे भलमन्सामे चयन करल हो । गाउँघरमे विकास निर्माणके काम, भोजभतेर लगायतमे भलमन्साके नेतृत्वदायी भूमिका रहठ् । ओस्टके, गाउँघरके सामान्य वादविवाद फेन बरघर भलमन्साहुक्रे मिलैना करटी आइल बाटै ।
ओस्टके, भेलासे अघरियामे जन्जीरु चौधरी ओ गाउँक सचिवमे सन्दरलाल चौधरीहे चयन करल बा । भलमन्साके अनुपस्थितिमे अघरिया कार्यबाहक भूमिका निर्वाह कैना करठै । ओस्टके, सचिव गाउँके बरस भरिक हरहिसाब रख्ना करल जनाइल बा ।
ओस्टके गाउँक चौकीदारके लाग चुनावी प्रक्रिया मार्फत रामप्रसाद चौधरी चयन हुइल बाटै । चौकीदारके लाग उहाँ सहित टेकसराम, दशीराम चौधरीके उम्मेदवारी परल ओरसे चुनावी प्रक्रिया मार्फत चौकीदार चयन करल हो ।
भुईयाँफाँटा गाउँमे करिब पाँच सय घरपरिवारके बसोबास रहल बा । कैलालीमे ढिउर परिवारके बसोबास रहल गाउँमध्येके इ फेन एक हो ।
