दोषीहे कार्वाहीके माग
पहुरा समाचारदाता
धनगढी, १८ माघ । कैलाली जिल्लाके डिभिजन वन कार्यालय पहलमानपुर अन्तर्गत सव डिभिजन वन कार्यालय पचमुडियामे कार्यरत सहायक वन अधिकृत विश्वराज पण्डित उप्पर हुइल दुर्व्यवहारप्रति टमान कर्मचारी संगठन ओकर छानविन करटी दोषीहे कार्वाहीके माग करले बटै ।
सहायक वन अधिकृत पण्डित कार्यालयके कामकाज करटी रहलबेला अपनेहुकन नेकपा (विप्लव) समुहके कार्यकर्ता बटुइया कुछ व्यक्ति सोम्मारके रोज कालोमोसो घाँसके दुव्र्यवहार करल रहिट ।
टमान कर्मचारी संगठन उ घटनाके विरोध करटी घटना बारे निषपक्ष छानबिन करके दोषीहे कारवाहीके लाग संयूक्त विज्ञप्ती मार्फत प्रमुख जिल्ला अधिकारीहे ज्ञापनपत्र बुझैले बा ।
ज्ञापनपत्र मार्फत स्वतन्त्र ओ भयमुक्त वातावरणमे काम कैना, आम राष्ट्रसेवकके जीउज्यान सुरक्षाके प्रत्याभूति करैना माग करले बा । विज्ञप्तीसे दोषीहे कानूनी कार्वाहीके दायरामे नन्ना स्थानीय प्रशासनसे विश्वासनीय वातावरण निर्माण करे नइसेक्लेसे टमान कर्मचारी संगठन आन्दोलन कैना निजामति कर्मचारीहुकनके आधिकारिक ट्रेड यूनियन कैलालीके अध्यक्ष विमल प्रकाश जोशी बटैलै ।
सयूक्त विज्ञप्ती मामर्फत ट्रेड यूनियन कैलाली, नेपाल निजामति कर्मचारी संगठन, नेपाल निजामति कर्मचारी यूनियन, नेपाल राष्ट्रिय कर्मचारी संगठन (निजामति), एकिकृत सरकारी कर्मचारी संगठन नेपाल, नेपाल फारेष्ट टेक्नििसियन एशोसियशन, प्रगतिशिल वन प्राविधिक संघ, नेपाल मधेशी निजामति कर्मचारी मञ्चसे विरोध जनैले बा ।
