जुवा तास ओ लागुपदार्थ नियन्त्रण कैना सुझाव
पहुरा समाचारदाता
मसुरिया, १८ माघ । कैलालीके मसुरिया क्षेत्रमे लागुपदार्थके सेवन ओ ओसारपसारमे वृद्धि हुइल बा ।
मंगरके इलाका प्रहरी कार्यालय मसुरियामामे हुइल चियापान तथा परिचयात्मक कार्यक्रममे सहभागी जनप्रतिनिधि राजनीतिक बुद्धिजीवी व्यापारी पाछेक समय लागुपदार्थके प्रयोगसे समाजमे शान्ति सुरक्षा चुनौतीपुर्ण बन्टी गैल बटैले बाटै ।
इलाका प्रहरी कार्यालय मसुरियामे सरुवा होके आइल प्रहरी नायब निरीक्षक डेनी बहादुर स्वार सँगके छलफलके क्रममे मसुरियामे जुवा तास, बेस्याबृत्ति ओ लागुपदार्थके कारोबारसे इ क्षेत्रके बदनाम हुइल कहटी प्रहरी ओ स्थानीयके संयुक्त पहलमे नियन्त्रण कैना हातेमालो करे पर्ना बटाइल हुइट ।
विगतमे इलाका प्रहरी कार्यालय मसुरियामे रहल नेतृत्व खासे चासो नैडेखाइल ओ प्राप्त सुचनाके चुहावट कैना करल ओरसे सामाजिक रुपमे विकृति विसंगति नियन्त्रण बाहर गैल उल्लेख कैटी पूर्व सांसद कृष्ण कुमार चौधरी शान्ति सुरक्षा कायम कैना राजनीतिक प्रभावसे उप्पर उठके काम कैना आग्रह करलै ।
मेडिकल, किराना पसल, खोका पसलसे लागुपदार्थके कारोबार व्यापक रूपमे फैलल् ओ विद्यालय उमेर समूहके किशोर÷युवा लुटपाट चोरी तस्करीमे संलग्न हुइल कहटी रातके समयमे घुमफिर करुइया समुहहे कारबाहीके दायरामे लाने पर्ना गौरीगंगा न.पा वडा नं ७ के अध्यक्ष दलबहादुर कुमाल बटाइल रहिट ।
सुनसान सार्वजनिक स्थल सामुदायिक वन क्षेत्रमे शंकास्पद रुपमे बैठुइया व्यक्ति समुह उप्पर प्रहरी निगरानी राखे पर्नामे वडा नं ९ के अध्यक्ष हरिप्रसाद तिवारी सुझाव डेहल रहिट ।
कार्यक्रममे जनप्रतिनिधि, बुद्धिजीवी, व्यापारी , सामाजिक अगुवा ओ संघसंस्थाके प्रतिनिधि तथा पत्रकारहुक्रनके सहभागिता रहल रहे ।
