पेट्रोलियम पदार्थके मूल्य फेन बह्रल

काठमाडौं, १९ माघ । नेपाल आयल निगम फेन पेट्रोलियम पदार्थके मूल्य बह्रैले बा । डिजल, पेट्रोल ओ मट्टितेलमे प्रतिलिटर ३ रुपैयाँ बह्रैले बा ।

अन्तर्राष्ट्रिय बजारमे इन्धनके मूल्य बह्रल जनैटि निगम पेट्रोल, डिजेल ओ मट्टितेलके साबिक मूल्यमे प्रतिलिटर ३÷३ रुपैयाँ बह्राइल हो । ‘भारतीय आयल निगमसे पठाइल नयाँ मूल्यसूची अनुसार इन्धनके मूल्य बह्रके आइल बा ।

नयाँ मूल्य अनुसार काठमाडौं उपत्यकामे पेट्रोल प्रतिलिटर १ सय ४२ रुपैयाँ, डिजेल ओ मट्टितेल १ सय २५ रुपैयाँ परि । पेट्रोलके यी मूल्य अब्बेसमके उच्च हो । यीआघे २०७० फागुन ३० गते प्रतिलिटर १४० रुपैयाँ रहे ।

अन्तर्राष्ट्रिय बजारमे कच्चा तेलके मूल्य प्रतिब्यारेल बह्रके ९० डलरसम पुगल ओरसे यहाँ फेन मूल्य बह्रल निगम जनैले बा । नयाँ मूल्य मंगरके रोज रात १२ बजेसे लागू हुइल बा ।

ओस्टेक, निगम आन्तरिक हवाई इन्धनके मूल्य प्रतिलिटर १० रुपैयाँ बह्राके १ सय १६ रुपैयाँ कायम करले बा । अन्तर्राष्ट्रियओरके हवाई इन्धन प्रतिकिलोलिटर १०० अमेरिकी डलर बह्राके १०९५ डलर तोकल बा । निगम खाना पकैना एलपी ग्यासके मूल्य भर यथावत रहल जनैले बा ।