पेट्रोलियम पदार्थके मूल्यवृद्धिके विरोध

पहुरा समाचारदाता
धनगढी, १९ माघ । पेट्रोलियम पदार्थमे हुइल मूल्यबृद्धिके विरोधमे धनगढीमे प्रदर्शन करल बा ।

नेकपा एमाले निकट अनेरास्ववियू ओ राष्ट्रिय युवा संघ धनगढी बजार क्षेत्रमे प्रदर्शन करल हुइट । उहाँहुक्रे मुख्यमन्त्री तथा मन्त्रिपरिषद्के कार्यालय आघे फेन प्रदर्शन करल रहिट ।

तत्काल पेट्रोलियम पदार्थमे हुइल मूल्यबृद्धि फिर्ता लेहे पर्ना कहटी उहाँहुक्रे विरोध प्रदर्शन करल हुइट । प्रदर्शनके क्रममे उहाँहुक्रे प्रधानमन्त्री शेरबहादुर देउवाविरुद्ध नारावाजी करल रहिट ।

पेट्रोलियम पदार्थमे हुइल मूल्यबृद्धि फिर्ता नैहुइटसम आन्दोलन जारी रख्ना उहाँहुक्रे जनैले बाटै । नेपाल आयल निगमसे पेट्रोलमे प्रतिलिटर तीन रुपैयाँ मूल्य बह्राइल जनैले बा । इसंगे आब पेट्रोल प्रतिलिटर १४२ रुपैयाँ पुगल बा कलेसे डिजेल ओ मट्टितेल १२५ कायम हुइल बा ।