धनगढीमे एमाले कार्यकर्ता ओ प्रहरीबीच झडप

पहुरा समाचारदाता
धनगढी, १९ माघ । पेट्रोलियम पदार्थमे हुइल मूल्यवृद्धिके विरोधमे हुइटी रहल प्रदर्शनके क्रममे एमाले कार्यकर्ता ओ प्रहरीबीच झडप हुइल बा । मुख्यमन्त्री तथा मन्त्रिपरिषद्के कार्यालय आघे एमाले निकट अनेरास्ववियू ओ राष्ट्रिय युवा संघसे विरोध प्रदर्शन करेबर प्रहरीसँग झडप हुइल हो ।

प्रधानमन्त्री शेरबहादुर देउवाके पुत्ला दहन ओ राके जुलुस निकारे खोजेबर प्रहरी अवरोध करलपाछे झडप हुइल अनेरास्ववियू कैलाली जनैले बा । झडपमे परके वडा प्रहरी कार्यालय धनगढीके प्रहरी निरीक्षक गौरीप्रसाद जैशी घाहिल हुइल बाटै । ओहकान सेति प्रादेशिक अस्पतालमे उपचार हुइटी रहल प्रहरी जनैले बा ।

अनेरास्ववियूके जिल्ला अध्यक्ष किशोर शाह प्रहरी शान्तिपूर्ण आन्दोलनमे लाठी चार्ज करल बटैलै । यहोर जिल्ला प्रहरी कार्यालय कैलालीके प्रहरी नायब उपरीक्षक वेदप्रकाश जोशी सामान्य धरपकड किल हुइल बटैलै ।

अनेरास्ववियू ओ राष्ट्रिय युवा संघसे तत्काल पेट्रोलियम पदार्थमे हुइल मूल्यवृद्धि फिर्ता लेहे पर्ना कहटी विरोध प्रदर्शन करल हुइट । पेट्रोलियम पदार्थमे हुइल मूल्यबृद्धि फिर्ता नैहुइटसम आन्दोलन जारी रख्ना उहाँहुक्रे जनैले बाटै ।

नेपाल आयल निगमसे पेट्रोलमे प्रतिलिटर तीन रुपैयाँ मूल्य बह्राइल जनैले बा । इसंगे आब पेट्रोल प्रतिलिटर १४२ रुपैयाँ पुगल बा कलेसे डिजेल ओ मट्टितेल १२५ कायम हुइल बा ।