कोरोना संक्रमणसे थप १२ के मृत्यु, ३,६३७ संक्रमित थप्लै
काठमाडौं, १९ माघ । कोरोना संक्रमणसे अक्के दिन १२ जनहनके मृत्यु हुइल बा । स्वास्थ्य मन्त्रालयके प्रवक्ता डा. संगीता मिश्रा नियमित प्रेस ब्रिफिङके क्रममे पाछेक २४ घण्टामे १२ जनहनके मृत्य हुइल जानकारी डेली ।
ओस्टके पाछेक २४ घण्टामे थप ३ हजार ६३७ जनहनमे कोरोना भाइरस (कोभिड–१९)के संक्रमण पुष्टि हुइल बा ।
स्वास्थ्य मन्त्रालयके अनुसार ६ हजार ४९९ जनहनके पीसीआर परीक्षण करेबर २ हजार २०५ जाने ओ ५ हजार ८३ जनहनके एन्टीजेन परीक्षण करेबर १ हजार ४३२ जाने कैके कुल ३ हजार ६३७ जनहनमे कोरोना संक्रमण पुष्टि हुइल हो ।
हाल देशभरमे ६९ हजार २९१ सक्रिय संक्रमित बाटै कलेसे ७ हजार ५५५ जाने संक्रमणमुक्त हुइल बाटै ।
बुधके थपलसंगे नेपालमे कोरोना संक्रमितके कूल संख्या १० लाख ९१ हजार ८८८ पुगल बा । ओस्टके नेपालमे मृत्यु हुउइयाके संख्या ११ हजार ७६४ पुगल बा कलेसे ८ लाख ७८ हजार ७२० जाने संक्रमणमुक्त हुइल बाटै ।
मन्त्रालयके अनुसार हाल ६७ हजार ८२५ जाने होम आइसोलेसनमे रहल बाटै कलेसे १ हजार ४६६ जाने संस्थागत आइसोलेसनमे रहल बाटै । कोरोनाके बिरामीमध्ये २७० जाने आईसीयू ओ ५२ जाने भेन्टिलेटरमे उपचाररत् रहल बाटै ।
ओस्टके १० बरस टरेक ६४ बालबालिकामे कोरोना संक्रमण पुष्टि हुइल बा कलेसे ११ से २० बरस उमेर समूहके १११ जाने कोरोना संक्रमित थपल बाटै ।
सुदूरपश्चिममे थप २०३ जनहनमे कोरोना संक्रमण
सुदूरपश्चिम प्रदेशमे थप २०३ जनहनमे कोरोना भाइरसके संक्रमण पुष्टि हुइल बा ।
स्वास्थ्य निर्देशनालय दीपायलसे सार्वजनिक करल तथ्यांकअनुसार ८ सय ३० जनहनके एन्टिजेन ओ १ सय ३८ जनहनके पीसीआर परीक्षण करेबर बुधके २०३ जनहनमे संक्रमण पुष्टि हुइल हो ।
बुधके संक्रमण पुष्टि हुइल मध्ये ४६ जाने बुधके रोज भारतसे आइल नागरिक हुइट । बुधके सुदूरपश्चिमके नाका होके ७५४ जाने स्वदेश आइल बाटै । निर्देशनालयके अनुसार प्रदेशमे ४ हजार ४७२ जाने सक्रिय संक्रमित पुगल बाटै । उहाँ मध्ये ८० जनहनके किल अस्पतालमे उपचार हुइटी रहल बा कलेसे अन्य सक्कु जाने होम आइसोलेसनमे रहल बाटै ।
