प्रतियोगिताके विजेता २१ लाख पैना
पहुरा समाचारदाता
धनगढी, १८ माघ । सर्वाधिक धनराशी रहल सुदूरपश्चिम खप्तड गोल्डकप प्रतियोगिता धनगढीमे हुइना बा ।
कोरोना भाइरसके कारण रुकल फुटवल प्रतियोगिता १ बर्षपाछे सारके आयोजना हुई लागल हो । फागुन १९ गतेसे धनगढी रगंशालामे फुटवल प्रतियोगिता हुई लागल पत्रकार सम्मेलन मार्फत आयोजकसे जानकारी डेहल हो । सुदूरपश्चिम ११ स्पोट्स क्लवके आयोजनामे प्रतियोगिता हुइना बा ।
सुदूरपश्चिमहे फुटवलके प्रदेशके रुपमे चिन्हाइक लाग शुरुवात करल मुख्यमन्त्री अन्तराािष्ट्रय सुदूरपश्चिम खप्तड गोल्डकपके पाँचौँ संस्करण फागुनमे हुई लागल हो । यी प्रतियोगितामे ५ ए डिभिजन क्लव, मोफसलके २, विदेशी २ ओ आयोजक करके १० टिम सहभागी हुइना आयोजक जनैले बा । प्रत्येक दिन करिब ५ हजार दर्शकसे अवलोकन कैना अनुमान लेहल आयोजक प्रतियोगिताभर ५० लाख ढेर दर्शकसे अवलोकन कैना अनुमान लेहल बा ।
प्रतियोगिताके विजेता २१ लाख रुप्या, उप विजेता १० लाख रुप्या नगद, ट्रफी, मेडल ओ प्रमाणपत्र पैही । प्रतियोगिताके उत्कृष्ट गोलकिपर, डिफेन्डर, स्टाइगर, मिड फिल्डर, सर्वाधिक गोलकर्ता, उदयमान खेलाडी ओ कोचहे २० हजार रुप्याके दरसे पुरस्कार उपलब्ध करैना आयोजक सुदूरपश्चिम ११ स्पोट्स क्लवके अध्यक्ष सुरेश हमाल जानकारी डेलै ।
प्रत्येक खेलके म्यान अफ द म्याच खेलाडीहे १० हजार नगद डेना बा । करिब १ करोड ५० लाख अनुमानित लागत रहल प्रतियोगिताहे सुदूरपश्चिम सरकारसे सहयोग करले बा । प्रतियोगिताहे सुदूरपश्चिम सरकारसे प्रायोजन कैना हुइल ओरसे यी बर्ष मुख्यमन्त्री अन्तराष्ट्रिय पाँचौ सुदूरपश्चिम गोल्डकप नामाकरण करल बा । खेल एन्फा तथा फिफाके नियमानसार खेलैना बा ।
