कोरोना संक्रमणके जोखिम, परीक्षण बिना एकान्तवासमे नागरिक
पहुरा समाचारदाता
धनगढी, २० माघ । कुछ अँठ्वार यहोर बह्रल जार ओ कोरोना भाइरसके फैलटी रहल संक्रमणके कारण सुदूरपश्चिमके स्थानीय सास्ती खेप्टी रहल बाटै ।
अत्यधिक जुरार मौसमसँगे घाँटी खसखस हुइना, बठैना, जुरी अइना, रुखाखोकी लग्ना, कपार पिरैना जैसिन कोरोना भाइरससँग मिल्ना लक्षण डेखगैल बिरामी बह्रना क्रम रोकल नैहो । अपने कोरोना सङ्क्रमित हुइल आशंकामे अइसीन लक्षण रहल ढिउर व्यक्ति नमूना परीक्षण नैकराके घरक एकान्तवासमे बैठ्ना बाध्य रहल बाटै ।
इ बेला हरेक घरमे अइसीन लक्षण रहिके सुटल कतिपय नमूना परीक्षण कराके ओ ढिउर नागरिक नमूना परीक्षणबिना नै एकान्तवासमे रहल बाटै ।‘नमूना जचाइबर कोरोना ‘पोजेटिभ’ डेखाडी, इहीसे घरक एकान्त कोठामे बैठ्ना उचित ठानके नमूना परीक्षण नैकराके बैठल बाटुु’, धनगढीके एक स्थानीयवासी कहलै । नमूना संकलन केन्द्रसम पुगके नमूना डेहे गैलबेला लागल भीडसे संक्रमित हुइना डर नागरिकमे डेखजाइठ् ।
धनगढीमे भेटल कञ्चनपुर कृष्णपुर नगरपालिका–९ के रोमती चौधरी रुघाखोकी जुरीके समस्यासे आपन घर परिवारके सदस्य पालिकपाला बिरामी परेबर सक्कु जनहनहे घरेलु उपचार कैके चोखाइल बटैली ।
उहाँ कहली, ‘इ बेला गाउँमे ढिउर व्यक्ति कोरोना भाइरस सङ्क्रमणजस्टे लक्षण डेखके जुरी आके सुटल बाटै । नमूना परीक्षण नैकराके ढिउर धेरै व्यक्ति चोखैटी फेन रहल बाटै ।’ इ लक्षण कोरोना भाइरसके लावा भेरियन्टके कारण रहल स्वास्थ्यकर्मी बटैले बाटै । हाल फैलल् कोरोनाके ओमिक्रोन भेरियन्टके सङ्क्रमण दर डेल्टा भेरियन्टसे छ सात गुणासे ढिउर हुइना करल बटाइल बा ।
अब्बे फैलल् कोरोना भाइरसहे ढिउर नागरिक सामान्य रुपमे लेके फेन यकर सङ्क्रमण दर बह्रल स्वास्थ्यकर्मीके कहाइ बा ।‘कोरोना फैलल् सुरुके बरस मनै निकै डराइल रहिट’, कैलालीके असिफ अन्सारी कहलै, ‘मनैनमे आब भर ढिरेसे कोरोनाके डर हेरैटी गैल डेखजाइठ् ।’ स्थानीय प्रशासन कोरोना रोकथामके लाग निषेधाज्ञा जारी कैलेसे फेन ओकर पालना कैना करैनामे नागरिकसे लापरबाही हुइटी रहल बा ।
जोखिम मोलके स्याहार कैटी कुरुवा
सेती प्रादेशिक अस्पताल धनगढीके कोभिड वार्डमे उपचाररत बिरामीके कुरुवा जोखिम मोलके बिरामीके स्याहार करे पर्ना बाध्यतामे बाटै । चिकित्सक ओ नर्सिङ् स्टाफ उपचार व्यवस्थापन करेबर कुरुवा स्वयम सघन उपचार कक्षसम पुगके बिरामीहे खाना खवाइ पर्र्ना अवस्था रहल बा । जेकर कारण कुरुवामे समेत सङ्क्रमणके जोखिम डेखल बा ।
सघन उपचार कक्ष बाहर भेटल कुरुवा वीरसिंह धामी कहलै,‘एकओर अब्बे जुरार मौसमके बेला बाहर लगलगैटी रात काटे परल बा,औरेआर बेडसम पुगके बिरामीके स्याहार करे परलमे अपनहे संक्रमित हुइना जोखिम रहल बा ।’
बिरामीहे उपचार व्यवस्थापनमे सहयोग पुगाइक लाग २४सै घन्टा कुरुवा बैठे परल ओहकान कहाइ बा । गैल बरसके कारोना महामारीके बेला अस्पताल नै कोरोनाके बिरामीहे निःशुल्क खाना खवाइटी आइल रहे । बजेट अभावके कारण इ बरस भर खानाके जोहो सम्बन्धित बिरामीके कुरुवा करे पर्ना बटाइल बा ।
कोरोना भाइरस फैलल् यहोर हालसम सुदूरपश्चिम प्रदेशमे ५८ हजार २८२ हजार व्यक्ति सङ्क्रमित होसेकल बाटै । विगत एक अँठ्वारभिट्टर संक्रमितमध्ये छ जनहनके मृत्यु होसेकल बा । स्वास्थ्य निर्देशनालय दीपायलके तथ्यांक अनुसार प्रदेशमे पाछेक एक अँठ्वारभिट्टर तीन हजार १८४ जनहनमे कोरोना भाइरस संक्रमण डेखल बा ।
