सुदूरपश्चिममे युवा ढेर संक्रमित

पहुरा समाचारदाता
धनगढी, २१ माघ । सुदूरपश्चिम प्रदेशमे कोरोना संक्रमित हुइनामे युवा पुस्तामे ढेर डेखल बटै । प्रादेशिक स्वास्थ्य निर्देशनालयसे सार्वजनिक करल हालसमके तथ्याङक अनुसार युवा पुस्तामे संक्रमण ढेर डेखल हो ।

निर्देशनालयसे एन्टिजेन परीक्षणबाहेक पीसीआर विधिसे करल परीक्षणसे संक्रमण पुष्टि हुइलमे २० से २९ वर्ष उमेर समूह युवा ढेर रहल तथ्याङक डेखाइल हो । उ तथ्याङक अनुसार टिसरा लहरके कोरोना संक्रमणसम पीसीआर विधिसे परीक्षण करेबेर ४१ हजार ६६० जाने संक्रमण हुइल बटै ।

जौ मन्से २०–२९ वर्ष उमेर समूहके युवा सबसे ढेर संक्रमित हुइल बटै । जौन मन्से आठ हजार ६८८ पुरुष ओ चार हजार ३९३ महिला करके १३ हजार ३१ जाने कोरोना संक्रमित हुइल निर्देशनालय जनैले बा । ओस्टेक करके, ३० से ३९ वर्ष उमेर समूहके पुरुष सात हजार ५८५ ओ महिला तीन हजार १८८ करके १० हजार ७७७ जाने संक्रमित हुइल बटै । ४० से ४९ वर्ष उमेर समूहके पुरुष चार हजार २८० ओ महिला एक हजार ८५९ करके छ हजार १३९ जाने संक्रमित हुइल डेखल बटै ।

ओस्टेक, ५० से ५९ वर्ष उमेर समूहके पुरुष दुई हजार ६३२ ओ महिला एक हजार १८३ जाने करके चार हजार ८१५ जाने व्यक्ति संक्रमित हुइल बटै । ६० से ६९ सम्मके वृद्ध एक हजार १०५ ओ वृद्धा एक हजार ८५९ करके एक हजार ७१२ जाने संक्रमित हुइल बटै । ओस्टेक, ७० से ७९ वर्ष उमेर समूहके वृद्ध ५६० ओ वृद्धा ३७५ करके ९३५ जाने वृद्धवृद्धा कोरोना संक्रमित हुइल बटै । प्रदेशभर ८० से १०० उमेरसमके वृद्धवृद्धाफे कोरोना संक्रमित हुइल निर्देशनालय जानकारी डेले बा ।

निर्देशनालयके अनुसार बालबालिका ओ किशोरकिशोरी संक्रमित हुइल दरमे फे कम नइहो । १० से १९ वर्ष उमेर समूहके किशोर दुई हजार २७४ ओ किशोरी एक हजार २४० करके तीन हजार ५१४ जाने किशोरकिशोरी कोरोना संक्रतिह हुइल निर्देशनालयके तथ्याङक डेखैले बा । ओस्टेक करके, १ से ९ वर्षके बालक ६२९ ओ बालिका ५४९ करके एक हजार ३७८ बालबालिका संक्रमित हुइल बटै ।

कामके सिलसिलामे युवा पुस्ता ढेर एक ठाउँसे दुसर ठाउँमे जैना करल कारण ओइनके संक्रमण ढेर डेखल बा । युवाशक्ति बाहेरके काममे ढेर सक्रिय हुके कारण युवायुवती ढेर संक्रमण हुइल जिल्ला स्वास्थ्य कैलालीके प्रमुख लालबहादुर धामीके कहाई बा ।

सुदूरपश्चिम प्रदेशके अत्यधिक युवा कामके लाग भारत जैना करल मंगरसमके तथ्याङक अनुसार प्रदेशभर चार लाख ७९ हजार ९६ जानेक परीक्षण करेबेर ५८ हजार ६१ जनहनमे कोरोना संक्रमण पुष्टि हुुइल बा । जेम्ने संक्रमण पुष्टि हुइल मन्से १६ हजार ४०१ जानेक एन्टिजेन विधिसे परीक्षण करल रहे । यी प्रदेशमे कोरोना संक्रमण हुइलपाछे ज्यान गुमुइयाके सख्या ६२४ पुगल बा । टिसरा लहरके कोरोना संक्रमणके कारण कुछ व्यक्ति ज्यान गुमैले बटै । ज्यान गुमुइया ढेर वृद्धवृद्धा बटै ।