हिमपातसे जनजीवन कष्टकर
पहुरा समाचारदाता
धनगढी, २१ माघ । सुदूरपश्चिम प्रदेशके उच्च हिमाली ओ पहाडी क्षेत्रमे हिमपात हुइल बा । प्रदेशके दार्चुला, बैतडी, डडेल्धुरा, बाजुरा, बझाङ, डोटी लगायतके जिल्लाके उच्च हिमाली ओ पहाडी क्षेत्रमे बिफेक रोजसे सुरु हुइल वर्षासँगे हिमपात हुइल हो ।
हिमपातपाछे बह्रल जुरारसे इ जिल्लाके जनजीवन प्रभावित बनल बा कलेसे ठाउँ–ठाउँमे राजमार्ग अवरुद्ध होके सवारी साधन चले सेकल नैहो । सुदूरपश्चिम प्रदेश ट्राफिक प्रहरी कार्यालय अत्तरियाके अनुसार हिमपातसे पहाडी जिल्लाके यातायात सेवा प्रभावित हुइल बा ।
सुदूूरपश्चिमके ७ पहाडी जिल्ला जोर्ना भीमदत्त राजमार्ग अवरुद्ध होके तराईसे पहाड जैना ओ तराई झर्ना कौनो फेन सवारीसाधन चले सेकल नैहो । प्रहरीके अनुसार डोटीके गैरा ओ डडेल्धुरामे भीमदत्त राजमार्ग अवरुद्ध हुइल बा ।
ओस्टके बैतडीमे अनारखोली, खोडपे, ढोल्यामोड, सतबाँझ, देहिमाडौँ लगायतके ठाउँमे मुख्य राजमार्ग अवरुद्ध हुइल बा कलेसे बझाङमे जयपृथ्वी राजमार्ग फेन अवरुद्ध हुइल बा ।
हिमपातके कारण सुदूरपश्चिमके पहाडी जिल्ला जोर्ना भीमदत्त राजमार्ग, महाकाली राजमार्ग, दशरथचन्द राजमार्ग ओ जयपृथ्वी राजमार्ग अवरुद्ध बनल प्रदेश ट्राफिक प्रहरी कार्यालय जनैले बा ।
सुदूरपश्चिम प्रदेशके उच्च हिमाली ओ पहाडी क्षेत्रमे इ बरस हिमपात हुइल इ टेसरचो हो । गत पुस ओ माघ डुसरा अँठ्वार फेन यहाँ हिमपात हुइल रहे ।
