लौवा संक्रमित १२५, चोखाइल संख्या ३२६
पहुरा समाचारदाता
धनगढी, २१ माघ । सुदूरपश्चिम प्रदेशमे शुकके रोज कोरोना भाइरसके लौवा सक्रमितसे चोखाइल संख्या बह्रल बा ।
सामाजिक विकास मन्त्रालय स्वास्थ्य निर्देशनालयसे डेहल जानकारी पछिल्का २४ घण्टाके रिपोर्ट अनुसार १ सय २५ जाने कोरोना संक्रमित ठपेबेर ३ सय २६ जाने चोखाइल बटै । एन्टीजेन ओ आरटी पीसिआर विधिसे १ हजार ५९ जानेक कोरोना परिक्षण करेबेर १ सय २५ जनहनमे ठप संक्रमण पुष्टि हुइल मन्त्रालय जनैले बा । कलेस ३ सय २६ जाने कोरोना मुक्त हुइल बटै ।
प्रदेशमे अब्बे आरटी पीसिआरके एक हजार एक सय ६९ ओ एन्टीजेनके २ हजार चार सय ११ करके ३ हजार ४ सय ८० जाने सक्रिय संक्रमित रहल मन्त्रालय जनैले बा । शुकके रोज प्रदेशके टमान ७ सय ४० जाने नेपाल भिटरेबेर ३४ जनहनमे संक्रमण पुष्टि हुइल बा ।
कोरोना संक्रमणसे थप १६ जानेक मृत्यु
पछिल्का २४ घण्टामे कोरोना भाइरस (कोभिड–१९) के संक्रमणसे थप १६ जानेक मृत्यु हुइल बा । २ हजार ५२६ जनहनमे संक्रमण पुष्टि हुइल बा ।
स्वास्थ्य तथा जनसंख्या मन्त्रालयके अनुसार देशभर ११ हजार ७३ नमुना परीक्षण करल रहे । ६ हजार ६५५ नमुनाके पीसीआर टेष्ट करेबेर एक हजार ६०२ ओ चार हजार ४१८ नमुनाके एन्टीजेन टेष्ट करेबेर ९२४ जनहनमे संक्रमण पुष्टि हुइल बा ।
पछिल्का २४ घण्टामे आठ हजार ४२५ जाने संक्रमणमुक्त हुइल बटै । हाल देशभर ५६ हजार ४५७ संक्रिय संक्रमित बटै । ५५ हजार ९० सक्रिय संक्रमित होम आइसोलेसनमे बटै कलेसे एक हजार ३६७ जाने संस्थागत आइसोलेसनमे बटै ।
ओइने मन्से २४३ जानेक आईसीयू ओ ५१ जानेक भेन्टिलेटरमे उपचार हुइटी रहल मन्त्रालय जनैले बा ।
