एलपीएलके मुख्य प्रायोजक धनगढी उपमहानगरपालिका

विजेताहे १ लाख ५० हजार डेना

पहुरा समाचाररदाता
धनगढी, २१ माघ । धनगढीमे अइना फागुन २ गतेसे आयोजना हुइना विद्यालय स्तरीय यु–१९ राष्ट्रिय क्रिकेट प्रतियोगिता लिटल फ्लावर प्रिमियर लिग (एलपीएल) छैटौँ संस्करणके मुख्य प्रायोजक धनगढी उपमहानगरपालिका रहना हुइल बा ।

लिटल फ्लावर स्पोर्ट्स एण्ड इभेन्ट्सके आयोजनामे फागुन १४ गतेसम सञ्चालन हुइना एलपीएल–६ के मुख्य प्रायोजक धनगढी उपमहानगरपालिका रहना शुकके धनगढीमे पत्रकार सम्मेलनके आयोजना करके जानकारी डेहल बा । उ पत्रकार सम्मेलनमे आयोजक ओ धनगढी उपमहानगरपालिकाबिच सम्झौता समेत हुइल बा ।

सम्झौतापत्रमे हस्ताक्षरपाछे धनगढी उपमहानगरपालिकाके मेयर नृप बहादुर वडसे उपमहानगरसे खेल ओ खेलाडीके स्तर वृद्धिके लाग अपनेहुक्रे यी क्षेत्रहे प्राथमिकताके साथ आघे बढाइल बटैलै । ‘हम्रे क्रिकेटमे एलपीएलहे विगतसे निरन्तर प्रोत्साहन प्रदान करटी आइल बटी,’ उहाँ कहलै, ‘क्रिकेटमे केल नइहो फुटबलओर फे हम्रे खप्तड गोल्ड कपसे और छोट–छोट प्रतियोगिताहे प्राथमिकतामे रख्ले बटी । ओस्टे प्रयाससे अब्बे एलपीएल खेलल खेलाडी राष्ट्रिय स्तरके और प्रतियोगितामे मजा छाप छोरना सफल हुइल बटै ।

यी प्रतियोगिता खेलाडी उत्पादन ओ खेल क्षेत्रके स्तरोन्नतिके लाग महत्वपूर्ण बन्टी गैल बटै ।’ लिटल फ्लावर प्रिमियर लिग निरन्तर छैटौँ संस्करणसम सञ्चालन हुइटी रहल प्रति खुसी व्यक्त करटी मेयर वड यिहीहे अभिन परिष्कृत बनाके आघे बढे पर्ना बटैलै ।

प्रतियोगिताके विजेताहे १ लाख ५० हजार ओ उप–विजेताहे ७५ हजार नगदसहित ट्रफी, मेडल ओ प्रमाणपत्र प्रदान कैना लिटल फ्लावर स्पोर्ट्स एण्ड इभेन्ट्सके अध्यक्ष रामचन्द्र शाही बटैलै । प्रतियोगिता सञ्चालनके तयारी अन्तिम चरणमे रहल कहटी उहाँ मैदान निर्माणके काम सम्पन्न हुइना तयारीमे रह बटैलै ।

प्रतियोगिताके सर्वोत्कृष्ट खेलाडीहे २० हजार, उत्कृष्ट बलर, ब्याट्सम्यान तथा उदयमान खेलाडीहे १०÷१० हजार प्रदान कैना शाही जानकारी डेलै । प्लेयर अफ द म्याचके साथे आसन्न संस्करणसे प्रत्येक खेलहे थप रोमाञ्चक बनैना गेम चेन्जर अवार्ड ओ सर्वोत्कृष्ट छक्का अवार्ड समेत थप करल आयोजक जनैले बा ।

प्रतियोगितामे काठ्माण्डौँ, कैलाली ओ कञ्चनपुरके १० विद्यालय स्तरीय क्रिकेट टिमके सहभागिता रही । जेम्ने प्रत्येक टिम ४ जाने विद्यालय बाहिरके १९ वर्ष टरेक खेलाडी समेत धारे पैही । आसन्न संस्करणमा नेपाली राष्ट्रिय क्रिकेट टिमके कप्तान देव खनाल, उप कप्तान शेर मल्ललगायतके खेलाडी समेत सहभागी हुइही । प्रत्येक टिमहे दुई समूहमे विभाजन करके समूह चरणमे एक टिमहे ४/४ ठो खेल खेलाजाई ।