प्रेस चौतारके २४ औँ स्थापना दिवस मनागिल

पहुरा समाचारदाता
धनगढी, २२ माघ । प्रेस चौतारी नेपालके २४ औँ स्थापना दिवस मनागिल बा । प्रेस चौतारी नेपाल, कैलाली शाखा धनगढीमे शनिच्चरके रोज एक कार्यक्रमके आयोजना कैके स्थापना दिवस मनाइल हो ।

प्रेस चौतारी नेपाल, कैलाली जिल्ला संयोजक भानुभक्त आर्चायके अध्यक्षमे हुइल कार्यक्रमके प्रेस चौतारी नेपाल सुदूरपश्चिम प्रदेशके इञ्चार्ज हेमन्त पौडेल उद्घाटन करले रहैं ।

कार्यक्रममे इञ्चार्ज पौडेल पत्रकार केक्रो दवाव, प्रभावमे नैपरके सही सूचना प्रवाह करनामे जोर डेलैं । पाछेक कुछ समय पत्रकारितामे फेन विकृति फैलल ओरसे जनताहे सुसूचित करैना पत्रकार अपन सिद्वान्त भुले नैपरल बटैलैं ।

कार्यक्रममे प्रेस चौतारी नेपालके केन्द्रीय सदस्य दिलबहादुर छत्याल पत्रकारिता विश्वासिलो बनाइपरनामे जोड डेलैं । उहाँ पत्रकार ओ पत्रकारिताके व्यवसायिक सुरक्षा भौतिक तथा शारीरिक सुरक्षाके सवालमे सक्कु संगठन ओ महासंघ गम्भीरतापूर्वक लागेपरना बटैलैं ।

ओस्टेक, कार्यक्रममे पत्रकार महासंघके सुदूरपश्चिम अध्यक्ष योगेश रावल सक्कु संगठनसे अपेक्षा ओ विश्वास करल बटैलैं । स्वच्छ, व्यवसायिक ओ निस्पक्ष पत्रकारिता करना आवश्यक रहल उहाँक कहाइ रहे ।

कार्यक्रममे नेपाल पत्रकार महासंघ कैलालीके अध्यक्ष हिमालय जोशी संगठित पत्रकारहुक्रे अपन पहिचानके प्रर्दशन करेपरना बेला आइल बटैलैं । दलगत पहिचान नैहोके समाजहे आघे बह्रैना लगैना पहिचानहे अब्बेक पत्रकारिताके आवश्यकता रहल उहाँ बटैलैं ।

कार्यक्रममे प्रेस चौतारी नेपाल सुदूरपश्चिम प्रदेशके सहइञ्चार्ज गोविन्द रोस्यारा, प्रेस युनियन कैलालीके अध्यक्ष श्रवण देउवालगायत मन्तव्य व्यक्त करले रहैं । मन्तव्यके क्रममे उहाँहुक्रे पत्रकार वैचारिक धरातल फरक रलेसे फेन पेशागत हकहितके लाग एकजुट हुइपरनामे जोड डेले रहैं ।

उहाँहुक्रे श्रमजीवी पत्रकारहुकनके हकअधिकार, पेशागत सुरक्षा, व्यवसायिकताके सवालमे एकजुट हुइनाके विकल्प नैरहल बटैलैं ।

प्रेस चौतारी नेपाल कैलालीके सदस्य कृष्णप्रसाद ओझा स्वागत करल कार्यक्रमके सञ्चालन चौतारीके सदस्य जनक बिष्ट करले रहैं ।