संक्रमणदर घटल, ठिक हुइना दर बह्रल
पहुरा समाचारदाता
धनगढी, २२ माघ । सुदूरपश्चिम प्रदेशमे कोरोना भाइरस संक्रमण दरसे चौखैना दर बह्रल बा । जेम्ने शनिच्चरके अपडेटमे प्रदेशमे ९० जनहनमे संक्रमण पुष्टि हुईबेर २ सय ४९ जाने चोखाइल बटै ।
सामाजिक विकास मन्त्रालय स्वास्थ्य निर्देशनालयसे डेहल जानकारी अनुसार पछिल्का २४ घण्टामे एक हजार ४७ जानेक कोरोना परिक्षण हुइबेर जम्मा ९० जानेकमे केल संक्रमण पुष्टि हुइल ओ ९ सय ५७ जानेक रिपोर्ट निगेटिभ डेखल मन्त्रालय जनैले बा । जेम्ने ९ सय ३१ जानेक एन्टीजेन परिक्षण करलमे ३५ जानेकमे संक्रमण डेखल रहे । कलेसे आरटी पीसिआर विधिसे १ सय १६ जानेक परिक्षण हुईबेर ५५ जनहनमे संक्रमण पुष्टि हुइल रहे । पछिल्का २४ घण्टामे २ सय ४९ जाने कोरोना मुक्त हुइल बटै ।
ओस्टेक शुकके रोज एक हजार ५९ कोरोना परिक्षण हुईबेर १ सय २५ जानेकमे संक्रमण पुष्टि हुईबेर ३ सय २६ जाने कोरोना मुक्त हुइल रहिट । गैल विफेक रोजफे १ हजार ३ सय १९ जानेक कोरोना परिक्षण करेबेर १ सय ७२ जानेकमे सक्रमण पुष्टि हुईबेर २ सय २४ जाने कोरोनासे मुक्त हुइल रहिट । अब्बेक अवस्था हेरेबेर संक्रमण दरसे निको हुइना दर बह्रटी गैल बा ।
प्रदेशमे अब्बे आरटी पीसिआरके ९ सय ७५ जाने सक्रिय संक्रमित बटै । जेम्ने सबसे ढेर कैलालीमे ६ सय १४, कञ्चनपुरमे १ सय ९७, अछाममे २७, बैतडीमे १९, बझाङमे ५, बाजुरामे २७, डडेल्धुरामे ७१, दार्चुलामे ४, डोटीमे ९ जाने रहल बटै । ओस्टेक एन्टीजेनके २ हजार ३ सय ३६ जाने सक्रिय संक्रमति रहल बटै । जेम्ने कैलालीमे ९ सय १५, कञ्चनपुरमे ५ सय २४, अछाममे ६६, बैतडीमे १ सय २५, बझाङमे १ सय ३९, बाजुरामे १ सय ८७, डडेल्धुरामे १ सय ७०, दार्चुलामे १ सय ५६, ओ डोटीमे ५४ रहल बटै । प्रदेशमे आरटी पीसिआर ओ एन्टीजेन करके ३ हजार ३ सय ११ जाने सक्रिय संक्रमित रहल बटै ।
शनिच्चरके रोज सुदूरपश्चिमके टमान नाकासे ९ सय ७४ जाने नेपाल भिटरल बटै । ओइनके एन्टीजेन विधिसे कोरोना जाँच करेबेर २७ जनहनमे संक्रमण पुष्टि हुइल स्वास्थ्य निर्देशनालय जनैले बा । जेम्ने कञ्चनपुरके गडडाचौकी नाकासे ४ सय ८८ जाने नेपाल भिटरबेर १० जनहनमे संक्रमण डेखल रहे । ओस्टेक कैलालीके गौरीफन्टा नाकासे ४ सय २३ जाने आइबेर ९ जनहनमे, बैतडीके पुलघाटसे ३७ जाने आइबेर ५ मे, दार्चुलाके पुलघाटसे २६ जाने आइबेर ३ जनहनमे संक्रमण डेखल बा । अभिनसम नेपाल भिटरल २ लाख ७ हजार ८ सय ४८ जानेक एन्टीजेन परिक्षण करेबेर ७ हजार २८ जानेकमे संक्रमण डेखल रहे । प्रदेशमे हालसम ४ लाख ८४ हजार ६ सय २६ जानेक कोरोना परिक्षण करेबेर ५७ हजार २ सय ४८ जानेक संक्रमण पुष्टि हुइल रहे । सुदूरपश्चिम प्रदेशमे हालसम ६ सय २५ जाने कोरोना संक्रमण पुष्टि हुइल व्यक्ति ज्यान गुमैले बटै ।
ओस्टेक पछिल्का २४ घण्टामे देशभर थप १ हजार ७१४ जनहनमे कोरोना भाइरसके संक्रमण पुष्टि हुइबेर ४ हजार ७ सय ७१ जाने संक्रमण मुक्त हुइल बटै । स्वास्थ्य तथा जनसख्या मन्त्रालयके अनुसार ८ हजार ५१३ जानेक परीक्षण करेबेर पीसीआर विधिसे १ हजार १ सय ३ ओ एन्टिजेन विधिसे ६ सय ११ जनहनमे संक्रमण पुष्टि हुइल हो ।
नेपाल हालसम कूल संक्रमित मन्से ९ लाख ६ सय ३९ जाने संक्रमणमुक्त हुसेकल बटै । नेपालमे निको हुइना दर ९३.३ प्रतिशत रहल बा । हाल देशभर ५२ हजार ७८० जाने सक्रिय संक्रमित रहल बटै ।
कोभिड–१९ के संक्रमणसे ठप ९ जाने ज्यान गुमैले बटै । हालसम देशभर ११ हजार ८०३ जाने ज्यान गुमासेकल बटै । स्वास्थ्य मन्त्रालयके अनुसार पछिल्का २४ घण्टामे ५ लाख ८८ हजार ४४० जाने कोरोनाविरुद्धके खोप लगैले बटै । हालसम ३ करोड ३८ लाख २६ हजार ३३० मात्रा कोरोनाविरुद्धके खोप लगासेकल बटै । यी मन्से १ करोड ५४ लाख ८२ हजार ८७ जाने पूर्ण मात्रा ओ १ करोड ७७ लाख ४० हजार ८३५ जाने कम्तीमे एक मात्रा खोप लगाइल मन्त्रालयके कहाई बा ।
नेपालम ७० प्रतिशत लगैले खोप
अमेरिकासे ७० प्रतिशतहे कोभिड १९ विरुद्धके पूर्ण मात्रा खोप लगैना सफल हुइलमे नेपालहे बधाई डेले बा ।
काठमाडौंस्थित अमेरिकी राजदूतावाससे शनिच्चर एक सूचना जारी करटी नेपालके वयस्क जनसंख्याके ७० प्रतिशतहे कोभिड १९ विरुद्धके खोप लगैना सफल हुइलमे नेपालहे बधाई डेहल हो ।
अमेरिका महामारीके शुरुवातसे नेपालके कोभिड १९ प्रतिकार्यके निरन्तर सहयोगी रहल बटैटी अभिनसम २३ लाखसे ढेर डोज कोभिड १९ भ्याक्सन सहयोग उपलव्ध कराइल दूतावाससे जारी सूचनामे उल्लेख बा । सूचनामे कहल बा ः ‘अमेरिकासे नेपालहे २३ लाखसे ढेर डोज कोभिड १९ भ्याक्सिन समेत झन्डै १२० मिलियन डलरसे ढेरके आर्थिक, सामग्री, तथा सेवा सहायता उपलब्ध करासेकल बा ।
नेपालीहुक्रे भाईरसहे परास्त कैना ओर सफल हुइटी गैलमे हम्रे हर्षित बटी । यी आघे विश्व स्वास्थ्य संगठनसेफे ७० प्रतिशत वयस्कहुक्रे कोभिड १९ विरुद्धके पूर्ण मात्रा खोप लगैना सफल हुइलमे नेपालहे बधाई डेहल रहे ।
