भारतीय गायिका लता मंगेशकरके निधन
काठमाडौं, २३ माघ । भारतीय प्रसिद्ध गायिका लता मंगेशकरके ९२ वर्षके उमेरमे अँटेवारके रोज निधन हुइल बा । कोभिड संक्रमित हुइलपाछे उहाँहे अस्पताल भर्ना करल रहे ।
कुछ हप्तायहोर उहाँहे मुम्बईस्थित ब्रिच क्यान्डी अस्पतालके सघन (आईसीयू) कक्षमे ढैके उपचार करटि आइल रहे ।
अँट्वार बिहान ८ः१२ मे उहाँक निधन हुइल अस्पताल प्रशासनहे उद्धृत करटि भारतीय समाचार संस्था हिन्दुस्तान टाइम्स उल्लेख करले बा ।
कुछ समययहोर उहाँक शरीरके टमान अंग काम करे छोरल उपचारमे संलग्न डाक्टर बटैले बटैं । उहाँक जन्म सन् १९२९ सेप्टेम्बर २८ मे भारतके इन्दौरमे हुइल रहे ।
मंगेशकर यीआघे सन् २०१९ के सेप्टेम्बरमे श्वासप्रश्वासमे समस्या डेखाइलपाछे अस्पताल भर्ना हुइल रहि । उहाँ सन् १९४३ मे अप्ने १३ वर्षके रहलमे पहिल गीत रेकर्ड करैले रहि । उहाँ अपन जीवनकालमे ३६ भाषामे ३० हजारसे ढेर गीत गैले बटि ।
९२ वर्षीया मंगेशकरहे अपन जीवनकालमे एक हजारसे ढेर हिन्दी सिनेमाके गीत गैले रहि । उहाँ नेसनल फिल्म अवार्ड‚ दादासाहेब फाल्के अवार्ड ओ भारत रत्नसहित दर्जनौं पुरस्कारसे सम्मानित हुइल रहि ।
