फागुन १ से विद्यालय खोल्न सिफारिस
खोप नइलगाइल बालबालिकाहे पालिकपाला
काठमाडौं, २३ माघ । कोभिड–१९ संकट व्यवस्थापन समन्वय केन्द्र (सीसीएमसीसी)से फागुन १ गतेसे भौतिक रुपमे कक्षा सञ्चालन कैना करैना सिफारिस करले बा ।
सीसीएमसीसीके प्रवक्ता सुनिता नेपालके अनुसार १२ वर्ष पूरा हुइल बालबालिका स्वास्थ्य मापदण्ड पालना करके नियमित कक्षामे सहभागी हुई पैही कलेसे १२ वर्ष टरेक बालबालिका भर बारअनुसार पालिक पाला कक्षामे सहभागी करैना करके सिफारिस करल हो ।
साथे फागुन १ गतेसे स्वास्थ्य मापदण्ड पालना करके जिम, फिल्म हल, फुटसललगायत रात्रिकालिन व्यवसाय दोहोरी, डान्सबारलगायत सञ्चालनके लाग सिफारिस करल बा । रात्रिकालिन व्यवसाय रात १० बजेसम केल सञ्चालन करे पैही । नेपाल कहली,‘पाटी प्यालेसमे फुल क्षमताके ५० प्रतिशत अथवा १०० से ढेर भेला हुई नइपैना करके सञ्चालन कैना सरकारहे सिफारिस हुइल बा मने, अब्बे भेला, सभा सम्मेलनमे लगाइल प्रतिबन्ध खुला करल नइहो ।’
ओस्टेक सोम्मारसे जोरबिजोर प्रणाली हटैना सिफारिस करले बा । अँटवारके बैठल कोभिड–१९ संकट व्यवस्थापन समन्वय केन्द्र (सीसीएमसीसी)के बैठकसे सरकारहे सिफारिस करल सीसीएमसीसीके प्रवक्ता नेपाल बटैली ।
