प्रदेशमे संक्रमणदर घटल
पहुरा समाचारदाता
धनगढी, २३ माघ । सुदूरपश्चिम प्रदेशमे कोरोना संक्रमणदर घटल बा । माघ पहिल अठुवार संक्रमण दर एकफाले बह्रलेसेफे अब्बे भर संक्रमणदर हवाट्टे घटल बा । माघ पहिल अठुवार प्रदेश एक्के दिनमे ५ सय से ६ सय संक्रमित ठप्लेसेफे अब्बे भर सयसे कममे संक्रमण डेखल बा । ओहोर चोखैना दरफे एकफाले बह्रल बा ।
स्वास्थ्य निर्देशनालयसे डेहल जानकारी अनुसार पछिल्का २४ घण्टामे सुदूरपश्चिम प्रदेशमे एक हजार ६४ जानेक कोरोना परिक्षण करेबेर ६५ जनहनमे केल संक्रमण डेखल बा । एन्टीजेन विधिसे एक हजार ५८ जानेक परिक्षण करेबेर ६४ मे ओ आरटी पीसिआर विधिसे ६ जानेक परिक्षण करेबेर एक जनहनमे कोरोना भाइरस संक्रमण डेखल निर्देशनालय जनैले बा । ओस्टेक यिहे अवधिमे १ सय ९४ जाने चोखाइल बटै ।
प्रदेशमे कोरोना यिहीसे आघेक अपडेट हेर्ना हो कलेसे संक्रमण घटदो क्रममे बा । शनिच्चके रोज एक हजार ४७ जानेक कोरोना परिक्षण हुइबेर जम्मा ९० जानेकमे केल संक्रमण पुष्टि हुइल रहे । कलेसे २ सय ४९ जाने कोरोना मुक्त हुइल रहिट ।
ओस्टेक शुकके रोज एक हजार ५९ कोरोना परिक्षण हुईबेर १ सय २५ जानेकमे संक्रमण पुष्टि हुईबेर ३ सय २६ जाने कोरोना मुक्त हुइल रहिट । गैल विफेक रोजफे १ हजार ३ सय १९ जानेक कोरोना परिक्षण करेबेर १ सय ७२ जानेकमे सक्रमण पुष्टि हुईबेर २ सय २४ जाने कोरोनासे मुक्त हुइल रहिट । अब्बेक अवस्था हेरेबेर संक्रमण दरसे निको हुइना दर बह्रटी गैल बा ।
प्रदेशमे अब्बे आरटी पीसिआरके ९ सय ७५ ओ एन्टीजेनके २ हजार एक सय ३२ जाने रहल बटै । अँटवारके रोज प्रदेशके टमान नाकासे ९ सय ३८ जाने नेपाल भिटरेबेर १८ जनहनमे संक्रमण पुष्टि हुइल रहे ।
स्वास्थ्य निर्देशनालयसे डेहल जानकारी अनुसार अँटवारके एक जाने महिलाके कोरोना संक्रमणके कारण उपचारके क्रममे मृत्यु हुइल बा । मृत्यु हुइलमे धनगढी उपमहानगरपालिका–८ कैलालीके ७६ बरसके एक महिला रहल बटी । प्रदेशमे हालसम ६ सय २६ जानेक कोरोना संक्रमणसे ज्यान गुमैले बटै ।
ओस्टेक करके पछिल्का २४ घण्टामे कोरोना भाइरस (कोभिड–१९) के संक्रमणसे देशभर थप ११ जानेक मृत्यु हुइल बा । १ हजार ३८६ जनहनके संक्रमण पुष्टि हुइल बा ।
स्वास्थ्य तथा जनसंख्या मन्त्रालयके अनुसार देशभर ९ हजार २५१ नमुना परीक्षण करल रहे । ६ हजार ४४३ जानेक पीसीआर परीक्षण करेबेर एक हजार १८३ ओ दुई हजार ८०८ जानेक एन्टीजेन परीक्षण करेबेर २०३ करके एक हजार ३८६ जनहनमे संक्रमण पुष्टि हुइल बा ।
पछिल्का २४ घण्टामे आठ हजार ७०४ जाने संक्रमणमुक्त हुइल बटै । हाल देशभर ४५ हजार २४८ सक्रिय संक्रमित बटै । ४३ हजार ९३२ सक्रिय संक्रमित होम आइसोलेसनमे बटै कलेसे एक हजार ३१६ जाने संस्थागत आइसोलेसनमे बटै ।
ओइने मन्से २६९ जानेक आईसीयू ओ ४६ जानेक भेन्टिलेटरमे उपचार हुइटी रहल मन्त्रालय जनैले बा ।
अँटवार थपलसंगे नेपालमे कोरोना संक्रमितके कूल संख्या ११ लाख ६८९ पुगल बा । ओस्टेक नेपालमे मृत्यु हुइलके संख्या ११ हजार ६१४ पुगल बा । कलेसे ९ लाख ९ हजार ३४३ जाने सक्रमणमुक्त हुइल बटै ।
ओस्टेक १० वर्ष टरेक २८ बालबालिकामे कोरोना संक्रमण पुष्टि हुइल बा कलेसे ११ से २० वर्ष उमेर समूहके ५५ जाने कोरोना संक्रमित थपल बटै ।
खोप नइलगाइल संक्रमितके मृत्यु ढेर
सुदूरपश्चिम प्रदेशमे कोरोना भाइरस (कोभिड–१९) के टिसरा लहर फैललपाछे पहिल चो गैल पुस ३० गते सेती प्रादेशिक अस्पतालमे उपचाररत एकजाने संक्रमितके मृत्यु हुइल रहे । २९ पुसमे संक्रमण पुष्टि हुके प्रादेशिक अस्पतालके कोभिड अस्थायी अस्पतालमे उपचाररत कैलालीके कैलारी गाउँपालिका–५ के ५३ वर्षीया महिलाके मृत्यु हुइल रहे ।
प्रादेशिक अस्पतालके अनुसार कोरोना भाइरस विरुद्धके खोपके पहिल मात्रा लगैलेसेफे मिर्गौला, मधुमेह ओ फोक्सोमे पानी भरना समस्याके कारण उ महिलाहे बचाइ नइसेक्गिल ।
सेती प्रादेशिक अस्पतालमे ४ माघमे गोदावरी नगरपालिका–४ के ७५ वर्षीय पुरुषके उपाचारके क्रममे मृत्यु हुइल । कोरोनाविरुद्धके खोप नइलगाइल उ पुरुष २३ पुसमे अस्पताल भर्ना हुइल रहिट । उच्च रक्तचाप ओ संक्रमणफे हुइलेसेफे उहाँक मृत्यु हुइल अस्पताल जनैले बा ।
ओक तीन दिनपाछे प्रादेशिक अस्पतालमे दुसर कोरोना संक्रमितके मृत्यु हुइल । २६ पुसमे कोरोना संक्रमण पुष्टि हुके उपचार करैटी रहल कञ्चनपुरके कृष्णपुर नगरपालिका–२ के ५२ वर्षीय पुरुषके मृत्यु हुइल रहे । अस्पतालके अनुसार उहाँ कोरोनाविरुद्धके खोप लगैले नइरहिट । मिर्गौला, मुटुसम्बन्धी समस्या रहल उ पुरुष निमोनियाके बिरामी रहिट ।
कोरोना संक्रमणके कारण वृद्धवृद्धा केल नाही युवाहुकनके फे मृत्यु हुइल अस्पतालके तथ्यांक डेखैले बा । मने ओइने मन्से अधिकांश खोप नइलगाइल ओ कौनो ना कौनो खालके दीर्घरोगी रहल मनै ढेर बटै ।
१६ माघमे अस्पतालमे उपचाररत कञ्चनपुरके कृष्णपुर नगरपालिका–१ के ३५ वर्षीय कोरोना संक्रमित पुरुषके मृत्यु हुइल । उ पुरुषसेफे खोप लगैले नइरहिट । उहाँ नसा ओ मुरीसम्बन्धी रोगसे ग्रसित रहिट ।
सेती प्रादेशिक अस्पतालके सूचना अधिकारी दीलिपकुमार श्रेष्ठके अनुसार कोरोना भाइरसके टिसरा लहर अर्थात ओमिक्रोन भेरियन्ट फैलल यहोर अस्पतालमे उपचारके लाग पुगल १० जाने संक्रमितके मृत्यु हुसेकल बा । ओइने मन्से ७ जाने दीर्घरोगी ओ कोरोनाविरुद्धके कौनो फे खोपके मात्रा नइलगाइल संक्रमित बटै कलेसे दुई जाने कोरोनाविरुद्धके खोपके पहिल मात्रा लगैले बटै । मृत्यु हुइल एक जाने संक्रमित भर खोपके दुनु मात्रा लगाइल व्यक्ति रहल श्रेष्ठ बटैलै ।
श्रेष्ठके अनुसार कोभिशिल्ड खोपके दुनु मात्रा लगाइल धनगढी उपमहानगरपालिका–३ बैठना ७४ वर्षीया संक्रमित महिलाके केही दिन आघे केल उपचारके क्रममे मृत्यु हुइल रहे । श्वासप्रश्वास सम्बन्धी बिरामी रहल उ महिलाके मुटुमे समस्या रहे कलेसे क्षयरोगफे हुइल रहे । कोरोना भाइरसके टिसरा लहरमे ढेर मनै संक्रमित हुइलेसेफे मृत्युदर कम हुइलमे खोपके प्रभाव हुइल चिकित्सक बटैठै ।
