अछामके दर्ना लघु जलविद्युत् सात वर्षमे बन्द

अछाम, २४ माघ । अछामके बान्निगढी गाउँपालिका–६ साबिक दर्ना गाविसमे २०७० सालमे पहिलचो बिजुली बत्ती बारल रहे । दर्नावासीके लम्मा प्रयासके बाबजुद कैलाश खोलुवाके पानीसे ८३ किलोवाट क्षमताके आयोजना सुरु हुइलेसे फने उ आयोजना सात बरस नैपुग्टी खस्कटी अवस्थामे पुगल बा । जलविद्युत् आयोजनाके पानीके कुलुवा बाढसे पुहाइलपाछे ओकर सञ्चालनके लाग कौनो पहल नैहुइल स्थानीयवासी बटैठै । स्थानीय क्षेत्रमे उत्पादन हुइल विद्युतसे स्थानीयवासीहे ढिउर राहत डेले किल नैरहे गाउँमे साना तथा मझौला उद्योग समेत सञ्चालनमे आइल रहे ।

साढे चार करोडके लागतमे निर्माण हुइल लघु जलविद्युत् आयोजनाके छ सय मिटर कुलुवा भत्कैले बा । उ आयोजनाके एक किलोमिटर सात सय मिटर लम्मा कुलुवा रहल बा । साबिकके दर्ना गाविसके ६६२ ओ कालागाउँ गाविसके ४५० घरधुरी विद्युतके पहुँचमे रहल रहे । आयोजना सञ्चालनके लाग अपनेहुक्रे पहल करल रलेसे फेन ओकर सुनुवाइ नैहुइल बान्निगढी जयगड गाउँपालिकाके अध्यक्ष राजेन्द्रबहादुर खड्का बटैले बाटै । “प्रदेशके माननीय आके आब विद्युत् आयोजना सञ्चालन नैलन्ना ओ राष्ट्रिय प्रसारण लाइन जोर्ना कहिके गैल बाटै । राष्ट्रिय प्रसारण लाइन फेन जडान हुइल”, गाउँपालिकाके अध्यक्ष खड्का कहलै, “अब्बे उपभोक्ता मारमे रहल बाटै । विद्युतके चुहावट बह्रल बा । प्राधिकरणहे एक बरसमे २८ लाख तिरे पर्र्ना डेखल बा । उपभोक्तासँग पैसा उठैले बा ।” उहाँ विद्युत् सहकारीमार्फत सञ्चालन हुइटी आइल राष्ट्रिय प्रसारण लाइनसे उपभोक्ताहुक्रे ढिउर मारमे परल बटैटी ओकर हाली समाधान कैना आवश्यक रहल बटैलै ।

गाउँपालिका अध्यक्ष खड्का उ फेन अस्थायी सम्झौताअनुसार बिजुली बत्ती बारल ओ २८ लाख बक्यौता तिरे नैसेकके तीनचो विद्युतलाइन काटल बटैटी ओकर गाउँपालिका जिम्मा लेके अब्बे जडान करल बटैलै । ओहकान अनुसार राष्ट्रिय प्रसारण लाइन जब फेन काटे सेकजाइ । उपभोक्ता लघुजलविद्युत् आयोजना सञ्चालनमे होके न्यूनतम ५० रुपैयाँ ओ प्रतियुनिट सात रुपैयााके दरसे विद्युत् महसुल तिरे परे । अब्बे राष्ट्रिय प्रसारण लाइन जोरलपाछे उपभोक्ताहुक्रे न्यूनतम एक सय रुपैयाँ ओ प्रतियुनिट १५ रुपैयाँका दरसे विद्युत् महसुल तिर्टी आइल बाटै । लघु जलविद्युत् आयोजना होके दिनमे २२ घन्टा बत्तीके सुविधामे रहल उपभोक्ता अब्बे कबुकाल विद्युत् अवरुद्ध होके दिनहु बत्ती बिना बैठे पर्र्ना अवस्थामे रहल स्थानीयवासी हिक्मत थापा बटैलै ।

लघु जलविद्युत् आयोजना सञ्चालनमे होके स्थानीय पाँचजाने रोजगारीसमेत पाइल रहिट । अब्बे जलविद्युत् आयोजना व्यवस्थापन समितिसे उहाँहुक्रनहे जागिरसे हटासेकल बा । २५ महिनाके तलबसमेत कर्मचारी अब्बेसम नैपाइल विद्युत् आयोजनामे काम कैटी आइल झनक थापा बटैलै । “पुरान २५ महिनाके तलब पैले नैहुइटी । आयोजना सञ्चालनके लाग फेन कौनो पहल हुइल नैहो । समितिसे माघ ५ गतेसे कर्मचारीहुक्रनहे अवकाश डेसेकल बा,” थापा कहलै, “जागिरसे अवकाश डेलेसे फेन काम करल पैसा टे डेहे पर्ना हो । घरी घरी अपनेहुक्रे आपनहुक्रे पाइ पर्ना रकम माग करलेसे फेन ओकर सुनुवाइ हुइल नैहो । ओम्ने फेन तीनजनहनके बीमाबापतके ५७ हजार फेन समिति टिरले नैहो ।”