निसर्गसे कपाल प्रत्यारोपण सेवा सुरु
पहुरा समाचारदाता
धनगढी, २४ माघ । धनगढीमे रहल निसर्ग हस्पिटल एण्ड रिसर्च सेन्टर प्रालि सुदूरपश्चिममे पहिलचो अस्पतालस्तरमे कपाल प्रत्यारोपण सेवा सुरु करले बा ।
शनिच्चरसे सुरु हुइल कपाल प्रत्यारोपण सेवा आबसे नियमित हुइना हस्पिटलके अध्यक्ष तीर्थराज पन्त जानकारी डेलैं ।
निर्भाना स्किन क्लिनिक एण्ड हेयर ट्रान्सप्लानट सेन्टर काठमाडौंसे आइल छालारोग तथा कपाल प्रत्यारोपण विशेषज्ञ डा. विपिन भट्टचन ओ निसर्ग हस्पिटलके छालारोग विशेषज्ञ डा. सुमित पाण्डेलगायतके टिम शनिच्चरके रोज एकजानेक कपाल प्रत्यारोपण कैके सेवा आरम्भ करल हो ।
यीआघे छालारोगके विशेष सेवा प्रदान करटि आइल अस्पताल अपन सेवा विस्तार करटि विकसित मुलुकमे सुुरु हुइल नवीनतम प्रणालीसे विश्वस्तरीय कपाल प्रत्यारोपण सेवा सुरु करल अध्यक्ष पन्त बटैलैं । यीआघे कपाल प्रत्यारोपण करना इच्छुकहुक्रे काठमाडौंलगायतके अन्य क्षेत्रमे जाइपरना बाध्यता आब हटल हस्पिटल जनैले बा ।
अपन कपालहे निकारके नैरहल ठाउँमे लगैना प्रक्रियाहे कपाल प्रत्यारोपण कहिजाइठ । यकर लाग कपारके पाछेक भाग, साइडके भाग, दाह्रिल ओ छातीके कपालहे निकारके कपाल नैरहल ठाउँमे लगाइ सेक्ना डा.पाण्डे बटैलैं । यी प्रक्रियाहे विश्वसनीय मानजैना चिकित्सक बटैठैं ।
