फाप्ला अन्तर्राष्ट्रिय क्रिकेट मैदान बन्ना
पहुरा समाचारदाता
धनगढी, २४ माघ । फाप्लामे अन्तर्राष्ट्रिय क्रिकेट मैदान बनैना वहस हुइल ८ वर्ष होसेकल, मने अभिनसम निर्माण प्रक्रिया आघे बह्रे सेकल नैहो । नेपाल सरकारके मन्त्रिपरिषद् बैठकसे फाप्लाहे अन्तर्राष्ट्रिय क्रिक्रेट बनैना निर्णय करले बा ।
धनगढी उपमहानगरपालिका वडा नम्बर ३ मे सरकारी जग्गामे फाप्ला अन्तर्राष्ट्रिय क्रिकेट मैदान ओ खेलग्राम बनैना निर्णय करल हो । फाप्लामे यीआघे कैचो मैदान निर्माणके लाग प्रदेश ओ संघीय सरकार बजेट विनियोजन करटि आइलमे जग्गा प्राप्तीके प्रक्रिया भर आघे बह्रल नैरहे ।
माघ १० गते बैठल मन्त्रिपरिषद्के बैठकसे मैदान ओ खेलग्राम निर्माणके लाग नेपाल सरकारके नाममे रहल २ लाख ६० हजार ९ सय १९ वर्गमिटर जग्गा उपलब्ध करैना पनि निर्णय करल हो । यी सम्बन्धी पूर्वाधार विकास लगायतके कार्य आघे बह्रैना फाप्ला अन्तर्राष्ट्रिय क्रिकेट मैदान ओ खेलग्राम विकास समिति गठन करना प्रक्रिया युवा तथा खेलकुद मन्त्रालय आघे बह्रैना निर्णयमे उल्लेख बा ।
मन्त्रिपरिषद्के निर्णयसे फाप्लामे अन्तर्राष्ट्रिय क्रिकेट मैदान निर्माणके सपना पूरा करना डगर खुलल ड्रिम फाप्लाके अभियान्ता सुवाश शाही खुशी व्यक्त करलैं । करिब आठ वर्ष आघे सुदूरपश्चिममे अन्तर्राष्ट्रिय क्रिकेट रंगशालाके चर्चा चलल रहे । क्रिकेटके शहरके उपमा पाइल फाप्लाहे अन्तर्राष्ट्रिय क्रिकेट रंगशाला बनैना अभियान उठल । अभियन्ताके एक समूह उ योजनाहे ‘ड्रिम फाप्ला’के रुपमा नामाकरण करल । ‘ड्रिम फाप्ला’ के नाम चिन्हल उ परियोजना सच्मे सुदूरपश्चिमके लाग एक सपना जस्टे रहे ।
‘एसपीए कप’ के संस्करण सन् २०१५ सम आपुगटसम धनगढीमे अन्तर्राष्ट्रिय स्तरके रंगशाला निर्माण करेपरना कटि योजना आघे सारल रहे । फाप्लाके लाग केन्द्रिय सरकार, प्रदेश सरकार ओ स्थानीय तहसे बजेट विनियोजन नैकरल भर नैहो । हरेक तहके सरकारसे गैल वर्षसम रंगशाला निर्माणके लाग बजेट विनियोजन करटि आइल रहे । मने, रंगशालाके लाग निरन्तर बजेट विनियोजन करलेसेफेन अपेक्षाकृत काम हुइ नैसेकल । सुरुवाती समयमे काममे तिव्रता लेलेसे फेन उ सुस्ताइल रहे ।
अब्बे रंगशाला गौचरणमे परिणत हुइल बा । गैल वर्षसम प्रदेश सरकारके बजेटमे समावेश करटि आइल फाप्ला चालू आर्थिक वर्षके बजेटमे छुट्टे शीर्षकमे समोटे नैसेकल । तत्कालीन रामशरण महत अर्थमन्त्री रहल बेला फाप्लाके लाग ४० लाख रुपैयाँ बजेट विनियोजन हुइल रहे । ओकरबाद औरसे वर्ष २० लाख विनियोजन हुइल । ‘ड्रिम फाप्ला’ अभियन्ता शाही उ बजेटके लाग उपभोक्ता समिति गठन करटि मैदानमे माटि डरना काम हुइल । ओहे बजेटसे मैदानहे घेरबार करना काम समेत सुरु हुइल ।
सरकारके सहयोगमे साढे २ करोड रुपैयाँ खर्च कैके मैदान मिलैना काम हुइल । ओकरबाद काम आघे बह्रे नैसेकल । फाप्लामे काम नैहुइलेसे फेन बजेट निरन्तर विनियोजन हुइटि आइल बा । रंगशाला निर्माणके कार्य आघे नैबह्रलपाछे गैल वर्षके बजेट समेत फ्रिज हुइल । आर्थिक वर्ष २०७५÷०७६ मे किल फाप्लाके लाग १८ करोड रुपैयाँ बजेट विनियोजन करले रहे, मने बजेट फिर्ता गैल रहे ।
