कैलारीसे पाँच वर्षके प्रगति विवरण सार्वजनिक

पहुरा समाचारदाता
धनगढी, २४ माघ । कैलालीस्थित कैलारी गाउँपालिकाके सोम्मार बैठल गाउँ सभा बैठकमे विषयगत समितिसे प्रगति विवरण प्रस्तुत करले बटै ।

नवौं अधिवेशनके दुसरा बैठकमे पाँच वर्षके दौरानमे करल टमान कार्यके प्रगति विवरण विषयगत समितिसे प्रस्तुत करल हुइट । गाउँपालिका एवम् गाउँ सभाके अध्यक्ष लाजुराम चौधरीके अध्यक्षतामे हुइल बैठकमे उपाध्यक्ष लक्ष्मी सत्गौंवा अपन नेतृत्वके न्यायिक समिति, राजस्व परामर्श ओ गाउँपालिका स्तरीय अनुगमन समितिके प्रगति विवरण प्रस्तुत करल रहिट ।

उ क्रममे उहाँ पाँच वर्षके दौरान गाउँपालिका स्तरीय अनुगमन समितिसे सक्कु योजना अनुगमन करल बटैली । उहाँ अधिकांश योजना सफल हुइल ओ कुछ योजना पूरा हुई नइसेकल उल्लेख करली । ‘पाँच वर्ष काम कैना क्रममे ढेर योजना सफल हुइल बटै, गाउँपालिकास्तरीय अनुगमन समितिके संयोजकसमेत रहल उहाँ कहली । ‘मने, कुछ योजनाके काम पूरा हुई नइसेकल हो ।’

बजेट अपुग रहल कारण ओसिन योजना पूरा हुई नइसेकल उहाँक ठम्याइ रहे । पाँच लाख रुप्यासे उप्परके योजना अनुगमन कैना अधिकार गाउँपालिका स्तरीय अनुगमन समितिहे रहल बा ।

ओस्टेक करके, गाउँपालिकास्तरीय न्यायिक समितिमे हालसम ५०० मुद्दा परल उल्लेख करटी न्यायिक समितिके संयोजकसमेत रहल उपाध्यक्ष सत्गौंवा ढेर मुद्दामे मेलमिलाप हुइलेसेफे दुई ठो मुद्दामे समिति असफल हुइल बटैली । ‘असफल हुइल मुद्दाके बारे न्यायिक समितिसे कार्यपालिका बैठकमे बारम्बार बाट रख्टी आइल बा, उहाँ कहली ।

संयोजक सत्गौंवासे न्यायिक समितिसे ५०० मुद्दामे छिनोफानो कैना क्रममे एकदम पारदर्शी तरिकासे मेलमिलाप कराइल उल्लेख करली । ‘महिला, बालबालिका, ज्येष्ठ नागरिक, अपाङ्ता हुइल व्यक्तिहे प्राथमिकता डेके न्यायिक समितिसे काम करल बा’, उहाँ कहली । चालु आर्थिक वर्षके हालसम ७१ मुद्दा परलमे ५१ ठो मुद्दामे मेलमिलाप कराइल सत्गौंवा जनैली ।

ओस्टेक, बैठकमे पूर्वाधार विकास समितिके संयोजक कमलप्रसाद चौधरी विगतसे हालसम करल कामके लेखाजोखा कैना आवश्यक रहल बटैलै । उहाँ आर्थिक वर्ष २०७४÷०७५ से चालु आर्थिक वर्षसम आके गाउँपालिकामे २५ ठो सरकारी भवन, नौ ठो सहकारीके भवन, ३७ ठो क्लब, समूह लगायतके टमान सामुदायिक भवन निर्माण हुइल जनैलै ।

ओस्टेक, गाउँपालिकामे ६.५ किलोमिटर कालोपत्रे हुइल, ५५ किलोमिटर लुज ग्राभेल हुइल, तराई मधेश कार्यक्रममार्फत ३.८ किलोमिटर, गाउँपालिकामार्फत २३.१, साझेदारीमार्फत १०.२ किलोमिटर सडक स्तरोन्नति हुइल उल्लेख करलै । ओस्टेक, भौतिक तथा जैविक करके १५ किलोमिटर तटबन्ध निर्माण हुइल, विद्यालय भवन लगायत शौचालय २२ ठो निर्माण लगायतके कार्य हुल बटैलै । ‘हम्रे अइना आघे एक गाउँसे दुसर गाउँसम जैना डगर नइरहे, उहाँ कहलै । ‘अब्बे सक्कु गाउँसम सहज रुपमे जाई सेक्ना डगर बनल बा ।’

विधेयक समितिके संयोजक राजेश सुनार अभिनसम ऐन, नीति, निर्देशिका, कार्यविधि लगायत ५२ ठो ऐन, कानून निर्माण करल जनैलै । उहाँ आवश्यक सक्कु ऐन, नीति निर्माण करल उल्लेख करलै । ओस्टेक, दलित समुदायके उत्थानके लाग गाउँपालिकासे थप कार्यक्रम नन्ना आवश्यक रहल बटैलै ।

आर्थिक विकास समितिके संयोजक कैलाशप्रसाद चौधरी अपन समिति अन्तर्गत पर्ना कृषि, उद्योगके कार्यक्रम सफल रहल बटैलै । उहाँ कृषि यान्त्रिकीकरण, कृषि व्यवसायीकरण ओ बजारीकरण, पर्यटन सम्बन्धी कार्यक्रम सक्कु सम्पन्न हुइल बटैलै । ओस्टेक, किसानहे ५० प्रतिशत अनुदानमे बीउ, मोटर पम्प वितरण करल, एक वडा एक पकेट कार्यक्रम अन्तर्गत हरेक वडामे पकेट कार्यक्रम सञ्चालन करल जनैलै । एक सहकारी एक उद्योग अन्तर्गत तीन ठो सहकारीसंग सम्झौता करलमे कुछ उद्योग स्थापना हुसेकल चौधरी जनैलै ।

ओस्टेक करके, वन, वातावरण तथा विपद् व्यवस्थापन समितिके संयोजक विष्णुप्रसाद चौधरी गाउँपालिकामे विपद् व्यवस्थापनके लाग जैविक तटबन्ध निर्माण, खाली ठाउँ, लडिया किनारमे वृक्षारोपण, तालके संरक्षण कार्य हुइल जनैलै । ओस्टेक, विपद् प्रतिकार्य सम्बन्धी तालिम प्रदान, समस्यामे परलहे आपतकालीन सहयोग, कोभिड महामारी रोकथाम सम्बन्धी कार्यक्रम, वनमे आधारित उद्योग स्थापना लगायतके कार्य हुइल उल्लेख करलै । उहाँ गाउँपालिकामे रहल तालतलैयाहुकनहे एकद्वार प्रणालीमार्फत आयआर्जनके लाग उपयोग कैना आवश्यक रहल बटैलै ।

विद्युत विस्तार समितिके संयोजक प्रेम चौधरी कैलारी गाउँपालिकाके जनप्रतिनिधिसे अपन बुद्धि, विवेक ओ क्षमतासे भ्याइटसम उत्कृष्ट काम कैना पर्यत्ना करल बटैलै । उहाँ नेपालमे कैलारी गाउँपालिकाके नाम उत्कृष्ट गाउँपालिकाके रुपमे आइबेर गर्व लग्ना करल उल्लेख करटी विविध आरोह–अवरोध ओ चुनौतीके बावजुद मजा काम करल बटैलै । ‘हमार क्षमता ओ गाउँपालिकाके पूँजीसे भ्याइटसम हम्रे मजा काम करले बटी, चौधरी कहलै ।

ओस्टेक, सामाजिक विकास समितिके संयोजक भागरती चौधरी गाउँपालिका साक्षर घोषणा हुइल ओ जातीय छुवाछुत तथा भेदभावमुक्त गाउँपालिका घोषणाके अन्तिम तयारीमे रहल बटैली । उहाँ सामाजिक कुरीतिविरुद्धके नीति, लक्षित वर्गके कार्यविधि लगायतके ऐन, नियम निर्माण हुइल उल्लेख करली । ओस्टेक, गाउँपालिकामे सामाजिक सचेतना, सरसफाई सम्बन्धी कार्यक्रम हुइल, सिकलसेलके परीक्षण हुइल, स्वास्थ्य बीमा लागु रहल ओ सिकलसेलके बिरामीहे गाउँपालिकासे यातायात खर्च डेना व्यवस्था करल जनैली । उहाँ सक्कु वडामे स्वास्थ्य पहुँच हुइल बटैली  ।

गाउँस सभामे उठल विषयमे स्पष्ट परटी गाउँ सभाके अध्यक्ष चौधरी कैलारी गाउँपालिकाके भलमन्सा÷बडघर प्रणाली संरक्षण, सम्वद्र्धन ओ विकास ऐन २०७८ मे कुछ बुँदा हटाइल स्पष्ट परलै । उहाँ भलमन्सा, बडघरके सवालमे गाउँपालिकासे कार्यविधि बनैना बटैलै । अध्यक्ष चौधरी भलमन्साके अवधि एक वर्ष रहना लोकतान्त्रिक विधि रहल उल्लेख करटी वडा कार्यालयसे ओइनहे परिचयपत्र डेना व्यवस्था कैना स्पष्ट परलै ।

गाउँ सभा बैठकमे सभाके सदस्य, गाउँपालिकाके प्रमुख प्रशासकीय अधिकृत वीरबहादुर ऐर, सामाजिक विकास शाखा प्रमुख यगम कलेल लगायत गाउँपालिकाके कर्मचारीहुकनके उपस्थिति रहल रहे । कोरोना भाइरसके संक्रमणहे मध्यनजर करके स्वास्थ्य मापदण्डके पालना करके बैठक सञ्चालन करल रहे । गाउँ सभाके दुसर बैठक मंगर आज दुपहर १ बजे बोलाइल गाउँपालिकाके प्रवक्ता कमलप्रसाद चौधरी जानकारी डेलै ।