कैलारीसे ठप छ ऐन पास

पहुरा समाचारदाता
धनगढी, २५ माघ । कैलालीस्थित कैलारी गाउँपालिकाके गाउँ सभासे छ ठो ऐन पास हुइल बा । मंगरके बैठल उ गाउँपालिकाके गाउँ सभा बैठकसे टमान छ ठो ऐन पास करल हो ।

गाउँपालिकाके अध्यक्ष लाजुराम चौधरीके अध्यक्षता बैठल बैठकसे कैलारी गाउँपालिकाके भलमन्सा/बडघर प्रणाली संरक्षण, सम्बद्र्धन र विकास ऐन २०७८, कैलारी गाउँपालिकाके स्थानीय सेवा ऐन २०७८ सभासे पास करले बा । ओस्टेक करके, कैलारी गाउँपालिकाके युवा नीति २०७८, कैलारी गाउँपालिकाके अनुगमन तथा सुपरीवेक्षण समिति कार्यविधि २०७८ पास करले बा । ओस्टेक, कैलारी गाउँपालिकाके बजेट तथा कार्यक्रम तर्जुमा समिति कार्यविधि २०७८ ओ कैलारी गाउँपालिकाके स्थानीय राजस्व समिति सञ्चालन कार्यविधि २०७८ सभासे पास हुइल गाउँपालिकाके प्रवक्ता कमलप्रसाद चौधरी जानकारी डेलै ।

गाउँ सभा बैठकसे टमान डगर मर्मत कैना निर्णयहे पास करले बा । वर्षाके कारण ढेर ठाउँमे डगराघाटा बिग्रल जनाइल बा । ओस्टेक करके, पुरैना तालके पानी किसानसे प्रयोग करे पैना सवालमेफे गाउँ सभासे निर्णय करले बा । कमल पोखरी नामसे चिन्हटी आइल उ तालके पानी वडा नम्बर ३ के जनता पहिलेसे उपयोग करटी आइल बटै । मने, पछिल्ला दिनमे तालमे व्यावसायिक मच्छरी पालन कार्य हुइलपाछे किसानसे मजासे पानी उपभोग करे नइपाइल जनाइल बा ।

यी सम्बन्धमे ठेकेदार ओ गाउँपालिकाबीच हुइल द्विपक्षीय सम्झौता परिमार्जन करके किसानहे सिँचाइ करे डेना गाउँ सभासे निर्णय करले बा ।

थारु समुदायके बाहुल्यता रहल कैलारी गाउँपालिकासे हालसम बनाइल ऐन, कानूनके संख्या ५८ पुगल बा । यी आघे, उ कार्यालयसे गाउँ सभासे ऐन १२ ठो, कार्यविधि २६ ठो, निर्देशिका छ ठो बनाइल रहे । ओस्टेक करके, नियमावली ओ नीति तीन÷तीन ठो, मापदण्ड ओ दिग्दर्शन एक/एक ठो निर्माण हुसेकल प्रवक्ता चौधरी जानकारी डेलै ।

गाउँ सभामे गाउँपालिकाके उपाध्यक्ष लक्ष्मी सत्गौंवा, गाउँ सभा सदस्यहुक्रे, गाउँपालिकाके प्रमुख प्रशासकीय अधिकृत वीरबहादुर ऐर, सूचना अधिकारी यगम कलेलसहित कर्मचारीहुकनके उपस्थिति रहल रहे । उ गाउँपालिकाके दुसर बैठक बुधके ११ बजे बोलाइल बा । उ दिन हिउँदे अधिवेशन समापन हुइना जनाइल बा