प्रेस चौतारी कैलालीके अध्यक्षमे भानुभक्त
पहुरा समाचारदाता
धनगढी, २५ माघ । प्रेस चौतारी नेपाल कैलालीके मंगरके रोज हुइल सातौं जिल्ला अधिवेशनसे लौवा कार्य समिति चयन कैगिल बा ।
अधिवेशनसे भानुभक्त आचार्यके अध्यक्षतामे लौवा कार्य समिति चयन करल हो । समितिके उपाध्यक्षमे निराजन परियार, उपाध्यक्ष(महिला) गिता चौधरी, सचिवमे जनकसिंह विष्ट, सहसचिवमे प्रेम विष्ट ओ कोषाध्यक्षमे लोकुसिंह ठकुरी चयन हुइल बटै ।
ओस्टेक सदस्यमे राम सुनार, अंकित उप्रेती, रौशनी विक, सागर परियार, अनिला स्वर्णकार, खगेन्द्र अवस्थी ओ कुलराज चौधरी चयन हुइल बटै । सहसचिव समावेशी ओ पाँच जाने कार्य समिति सदस्यहे भर जिल्ला कार्य समितिसे मनोनित करी । प्रेस चौतारी सुदूरपश्चिमके सहइन्चार्ज गोविन्द रोस्याराके संयोजकत्वमे गठित अध्यक्ष मण्डलसे प्रस्ताव करल कार्य समितिहे बन्द सत्रसे अनुमोदन करल रहे ।
ओस्टेक करके प्रेस चौतारी कैलालीसे चार जाने पूर्व अध्यक्षहे संगठन विस्तारमे खेलल योगदानके कदर करटी सम्मान करले बा । सम्मानित हुइलमे पूर्व अध्यक्ष हेमन्त पाडेल, शेरबहादुर बस्नेत, बिरेन्द्र रावल ओ मातृका तिमिल्सेना रहल बटै ।
ओइनहे दोसल्ला ओढाके प्रशंसा पत्रसहित सम्मान करल बा । प्रेस चौतारीके केन्द्रीय अध्यक्ष गणेश बस्नेतके वडका पहुनामे हुइल उदघाटन सत्रमे प्रदेश इन्चार्ज हेमन्त पौडेल, महासचिव शिवराज भट्ट लगायतके उपस्थिति रहल रहे ।
