युवाहुकनहे खेलकुदके सामग्री

पहुरा समाचारदाता
बर्दिया, २६ माघ । युनिक नेपाल बर्दियासे युनिक स्पोर्ट्स् क्लबके भलिबल ओ फुटबल समूहहे खेलकुदके सामग्री सहयोग करले बा ।
युनिक नेपालमे आयोजित उ कार्यक्रममे दुई समूहहे भलिबल नेट, भलिबल ओ फुटबललगायतके सामग्री सहयोग करल हो । कार्यक्रममे खेलकुद सामग्री हस्तान्तरण करलपाछे युनिक नेपालके अध्यक्ष प्रिमबहादुर थारु युनिक नेपालसे युवाहुकनके मानसिक ओ शारीरिक स्वास्थ्यके विकास मार्फत समग्र समाज ओ देश स्वस्थ हुइल हेरे चाहल बटैलै ।
उहाँ कहलै, युवाहुक्रे देशके सम्पत्ति हुइट । ओइनके रचनात्मक कार्यमे लागेक दाग ओ खेल मार्फत स्वस्थ रहेक लाग खेलकुद सामग्री सहयोग कैगिल हो । यी वर्ष पाइलटिङ्गके रुपमे खेलकुद क्षेत्रहे समेटल हुइलसेफे अइना आर्थिक वर्षमे राजापुर नगरपालिका ओ गेरुवा गाउँपालिकाके सक्कु वडाहुकनहे समेट्न कोशिस रहना उहाँ बटैलै ।

युनिक नेपालके कार्यक्रम अधिकृत सोम डेमनडौरा युवा देशके गहना रहल बटैलै । उहाँ कहलै, युवा देशके रक्षक ओ विकासके संवाहक हुइल ओरसे युवाहुक्रे स्वस्थ रहनाके साथे सकरात्मक सोंचके विकास करे सेक्लेसे केल देशसे मुहार फेर्ना, यकर लाग नियमित खेलमे आवद्ध हुई परल ।
अपनहे जटराफे आधुनिकमे, काटल पाइन्ट ओ लम्मा कपाल, मुन्द्रा लगैलेसेफे उ युवाहुकनमे अपन माटी, डाई ओ अग्रजहुक्रे आघे जबफे सम्मान कैना बानी हमार युवाहुकनके पहिचान हो कहिके उत्प्रेरणा जगैना रहल उहाँ बटैलै ।
कार्यक्रममे युनिक नेपालके सचिव निर्मला थारु युवाहुक्रे कुलतहे त्यागके खेलमे आकर्षण बढैलेसे देशके भविष्य फेरना बटैलै । ओस्टेक करके कार्यक्रममे युवा नेता सिताराम थारु खेल मार्फत सक्कु युवाहुक्रनबिच मेलमिलापके भावना जागृत करटी स्वस्थ समाजके विकासके लाग युवाहुकनके महत्वपूर्ण भूमिका रहना बटैलै ।

कार्यक्रममे युनिक नेपालके कार्य समिति सदस्यद्धय राधा चौधरी ओ राधेश्याम थारु, युवा विद्यार्थी नेता जगतराम थारु, जोतपुरके बरघर वीरेन्द्र दहित, युनिक स्पोर्ट्स् क्लबके अध्यक्ष रामस्वरुप थारु, बालाबजार खेलकुद समितिके अध्यक्ष देवेन्द्र थारु, सुम्मत सहकारी संस्था लिमिटेडके अध्यक्ष रघुराम थारु, ग्रामीण युवा विकास समाजके अध्यक्ष बिमल चौधरी लगायतके युवाहुकनके महत्वपूर्ण उपस्थिति रहल रहे ।
