‘हम्रे गठबन्धन सरकार चलाके विकास करली’
पहुरा समाचारदाता
कैलारी, २६ माघ । कैलाली जिल्लाके कैलारी गाउँपालिकाके नवौं गाउँ सभा अर्थात हिउँदे अधिवेशन बुधके रोज ओराइल बा । माघ ११ गतेसे उ गाउँपालिकाके हिउँदे अधिवेशन सुरु हुइल रहे ।
यी अधिवेशनमे गाउँ सभासे छ ठो ऐन, कानून पारित हुइल बा । ओस्टेक करके, आवश्यक और निर्णयफे गाउँ सभासे पास करले बा । कैलारी गाउँपालिकाके जनप्रतिनिधिसे अपन पाँच वर्षे कार्यकालमे गाउँ सभासे ५८ ठो ऐन, कानून बनैले बटै ।
गाउँ सभाके हिउँदे अधिवेशनके अन्तिम् बैठकहे सम्बोधन करटी गाउँपालिकाके अध्यक्ष लाजुराम चौधरी अपनेहुक्रे विकासके लाग स्थानीय सरकारमे जनप्रतिनिधिके रुपमे आइल बटैलै । उहाँ पाँच वर्षके लाग स्थायी सरकारमे आइल ४९ जाने जनप्रतिनिधिसे एकताके प्रतिक्रियासे गाउँपालिकाके विकास करल उल्लेख करलै ।
हम्रे टमान पार्टीसे, फरक क्षमता, फरक विचार, फरक चुनावी नारा बोकके स्थानीय सरकारमे आइल रही, अध्यक्ष चौधरी कहलै । ‘मने, सक्कुहुनके क्षमताके एकता गाउँपालिका रहली । जौनफे पार्टीसे अइलेसेफे गठनबन्धनके सरकार चलैली ।
सत्तापक्ष ओ प्रतिपक्ष कना नइरहे ।’ उहाँ अपनेहुक्रे आर्थिक, सामाजिक, साँस्कृतिक रुपमे विकास कैना सफल हुइल उल्लेख करलै ।
भूगोलके हिसाबसे कठिन हुइल ठाउँमे बजेट विकेन्द्रीकरण करके विकास करल अध्यक्ष चौधरी बटैलै । उहाँ स्थानीय तहमे राजनीतिक नेतृत्व ओ प्रशासनिक नेतृत्व रहल उल्लेख करटी विकासके लाग राजनीतिक ओ प्रशासनिक दुनु नेतृत्व एकजुट हुके काम कैना आवश्यक रहल औंल्यइलै ।
अध्यक्ष चौधरी ब्युरोक्रेसीसे मुरीमे टेक्केलेसे राजनीतिक नेतृत्व कमजोर हुइना उल्लेख करटी कतिपय अवस्थामे ब्युरोक्रेसीसे कार्यशैली सुधार कैना आवश्यक रहल उल्लेख करलै । उहाँ गाउँपालिकासे बनाइल कानून सक्कु जे अक्षरस पालना कैना जरुरी रहल बटैलै । निकट भविष्यमे अपनेहुक्रे जनप्रतिनिधिके जिम्मेवारीमे रहलेसेफे वा नइरहलेसेफे कैलारी गाउँपालिकाके विकास कैना सक्कुहुनके दायित्व रहल अध्यक्ष चौधरीके कहाई रहे ।
गाउँपालिकाके उपाध्यक्ष लक्ष्मी सत्गौंवाके अध्यक्षतामे बैठल गाउँ सभा बैठकसे गाउँ सभामे उठल कुछ विषयमे आधारित निर्णयसमेत पास करले बा । सभामे गाउँ सभाके सदस्यहुक्रे, गाउँपालिकाके प्रमुख प्रशासकीय अधिकृत वीरबहादुर ऐर, सूचना अधिकारी यगम कलेल, शिक्षा शाखा प्रमुख गणेश मिश्र, स्वास्थ्य शाखा प्रमुख वीरेन्द्र सापकोटा, प्रशासन तथा जिन्सी शाखा प्रमुख सोमप्रसाद चौधरी, योजना शाखा प्रमुख सन्तोषकुमार चौधरी लगायतके कर्मचारीहुकनके उपस्थिति रहल रहे ।
