द्वन्द्वपीडितके आवश्यकता सम्बोधन कैना सरोकारवालासे प्रतिवद्धता

पहुरा समाचारदाता
धनगढी, २७ माघ । द्वन्द्वपीडितहुकनके परिपुरण ओ तत्कालिन आवश्यकताहे सम्बोधन कैना सरोकारवालासे प्रतिवद्धता जनैले बटै ।

विफेक रोज फुलवारीमे आयोजित एक कार्यक्रममे सरोकारहुक्रे द्वन्द्वपीडितके परिपुरण ओ तत्कालिन आवश्यकता सम्बोधन कैना अपनेहुक्रे तयार रहल बटाइल हुइट । धनगढी उपमहानगरपालिका वडा नम्बर १८ के अध्यक्ष मुरारी अधिकारी द्वन्द्वपीडितके परिपुरण ओ तत्कालिन आवश्यकता सम्बोधन कैना हाली राहत प्याकेज नाने लागल बटैलै ।

द्वन्द्वपीडितहुकनके लाग वडा कार्यालयसे अब्बे सेक्ना सहयोग करटी रहल बटी,’ वडा अध्यक्ष अधिकारी कहलै, वडा कार्यालयसे सिफारिस करेबेर बालबालिका निःशुल्क पैले बटै । पालिकासे नीति निर्माण हुइलेसेफे निर्धक्कसे सहयोग कैना वातावरण बनट ।’ वडा कार्यालयमे द्वन्द्वपीडितहुकनके लाग कहिके कौनोफे मेरिक बजेट नक्ष्अइलेसेफे वडा कार्यालयसे हाली राहत प्याकेज नन्ना अध्यक्ष अधिकारी बटैलै ।

धनगढी उपमहानगरपालिका वडा नम्बर १४ के अध्यक्ष रामबजारी चौधरीसेफे वडा कार्यालयके सिफारिसमे अभिभावक नइरहल बालबालिका मावि तहसम निःशुल्क अध्ययन कैना अवसर पाइल बटैलै । उहाँ कहलै पालिकासे द्वन्द्वपीडितहुकनके सहयोगके लाग वडा कार्यालयहे परिपत्र नइआइल ओरसे अलगे मेरिक सहयोग करे नइसेकल ओरसेफे ओस्टे समस्या लेके अउइयाहे सीपमुलक तालिममे सहभागी कराइल बटैलै । वडा कार्यालयमे एकल महिला भत्ता, बृद्धा भत्ता, अपाङता भत्ता अइना करलेसेफे द्वन्द्वपीडितहुकनके लाग कबुफे बजेट नइआइल वडा अध्यक्ष बटैलै ।

धनगढी उपमहानगरपालिका वडा नम्बर १९ के अध्यक्षके तिलुराम चौधरी वडा कार्यालयसे कुहीहे भेदभाव नइकरके समस्यामे परलहुकनहे वडासे सहयोग करटी रहल बटैलै । उहाँ द्वन्द्वपीडितके परिपुरण ओ तत्कालिन आवश्यकता सम्बोधन कैना पालिकास्तरसे नीति निर्माणमे जोड डेहल रहिट ।

समावेशी संक्रमणकालिन न्याय, मेलमिलाप तथा द्वन्द्व समाधानका लागि जिल्ला संजाल कैलाली ओ एफडब्लुएलडीके आयोजना तथा इन्टरनेशनल एलार्टके समन्वयमे द्वन्दपीडितके परिपुरण ओ तत्कालिन आवश्यकता सम्बोधन कैना सरोकारवालाहुकनके भूमिका विषयक संवाद कार्यक्रम हुइल रहे ।

कार्यक्रममे फुलवारीके स्थानीय तथा शिक्षक विकास खडका ओ महेशकुमार सुनार सशस्त्र द्वन्द्वकालके बेला ढेर जाने पीडित हुइलेसेफे वर्गीकरण हुई नइसेकल बटैलै । विद्रोही पक्षसे मारलहुकनहुक्रे क्षतिपूति पैलेसेफे राज्यपक्षसे पीडित हुइल कतिपय क्षर्तिपूति नइपाइल बटैलै ।
टिपिओ नेपालके मनोविशर्माकर्ता कमला बुढाथोकी द्वन्दकालके कतिपय पीडितसे सम्बन्ध विग्रना डरसे समस्या बाहेर नाने नइसेकल बटैली । उहाँ कहली खास करके द्वन्दकालके बेला यौन हिंसा खेपल महिलाके घरबार विग्रना डरसे अपने भोगल समस्या खोले नइसेक्के पीडा भोग्टी रहल बटैलै ।

समावेशी संक्रमणकालिन न्याय, मेलमिलाप तथा द्वन्द्व समाधानका लागि जिल्ला संजाल कैलालीके संयोजक गणेश मल्ल ढिला न्याय डेना कहल न्याय नइडेना बराबर रहल बटैलै । सशस्त्र द्वन्दकालके बेला मुलुकके ढेर जाने पीडित हुइलेसेफे ओइनके आवाज सुनुवाई नइहुइल बटैलै । उहाँ कहलै कतिपय स्थानीय तहसे द्वन्द्वपीडितके द्वन्दपीडितके परिपुरण ओ तत्कालिन आवश्यकता सम्बोधन अलगे मेरिक बजेट नानके कार्यक्रम करटी बटै । मने सक्कु स्थानीय तहमे द्वन्द्वपीडितके लाग उहे मेरिक बजेट विनियोजना हुई नइसेकल हो । द्वन्द्वकालके पीडितहुकनके वर्गिकरण करके ओकरे आधारमे आब सरकारसे अघि बढे पर्ना संयोजक मल्ल बटैलै ।

एफडब्लुएलडीके जिल्ला संयोजक रेनुप्रधान श्रेष्ठ कैलालीमे द्वन्द्वपीडितके अभिलेख बारे जानकारी डेटी मृतकके संख्या ५१५, विस्थापित एक हजार ३९, घाहिते÷अपाङता २२२, वेपत्ता १८, अपहरण २८ ओ टुहुरा बालबालिका ६९ जाने रहल बटैली ।