प्रदेशके राजनीतिक अवस्था अनुसन्धान पुस्तक विश्लेषण
पहुरा समाचारदाता
धनगढी, २७ माघ । ब्याकवार्ड सोसाइटी एजुकेशन (बेस) तुलसीपुर दाङसे करल संघीयतामे सुदूरपश्चिम प्रदेशके राजनीतिक अवस्था अनुसन्धान पुस्तक विश्लेषण सन्दर्भ बिफेक रोज संवाद कार्यक्रम हुइल बा । यी अनुसन्धान पुस्तकके उद्देश्य संघ, प्रदेश ओ स्थानीय तहसे प्रवाह करल सेवाके साथे राजनीतिक स्थिरता, शान्ति निर्माण, सुशासन, स्वास्थ्य क्षेत्रके चुनौतिलगायतके विषयमे लेखाजोखा करना रहे ।
अनुसन्धानकर्ता शेखर पराजुलीसे तयार पारल विश्लेषण पस्तकमे सरकारबीच समन्वयहे चुस्त बनैना अन्तर प्रदेश परिषद्के बैठक नियमित बोलाइ परना ओ योजनावद्ध रूपमे काम करेपरना सुझाव डेहल बा । ओस्टेक, स्थानीय एवं प्रदेश सरकारहे विश्वास कैके संविधान प्रदत्त अधिकार प्रत्यायोजन करनामे कञ्जुसाइ नैकरेपरनालगायतके सुझाव प्रस्तुत करल बा ।
सुदूरपश्चिम प्रदेशके सामाजिक विकासमन्त्री लालबहादुर खड्का प्रदेश सरकारसंग जनताके अपेक्षा ढेर रहल ओरसे सब काम करे नैसेकल बटैलैं । उहाँ कलैं, ‘जनताके अपेक्षा ढेर बा, मने सरकारके बजेट, योजना सीमित बा । ओहे मारे प्रदेश सरकार जनताके माग पूरा करे नैसेकठो ।’
प्रदेश सरकारके योजना प्रदेशस्तरीय ठोरचे भारी रहठ, मने जनता अपन स्थानमे विकास खोजठ उ प्रदेश सरकारसे हुइ सेकल नैहो । टबेमारे स्थानीय जनता प्रदेशहे प्रत्यक्ष सरकारके रूपमे लेहे नैसेकल हुइट । अइसिके प्रदेश सरकार काम करले बा मने नैडेखाइल हो, उहाँ बटैलैं ।
कार्यक्रममे सुदूपश्चिम प्रदेशके मुख्य न्याअधिवक्ता कुलानन्द उपाध्याय संघीयता नयाँ अभ्यास रहल ओरसे प्रदेश सरकार सक्रिय हुइ नैसेकल जस्टे डेखाइल बटैलैं । उहाँ प्रदेशके राजनीतिक अवस्था अनुसन्धानसे सरकारहे मार्गनिर्देशन करे सेक्ना बटैलैं । ओस्टेक, गैरसरकारी संस्था महासंघ केन्द्रीय सदस्य सावित्रा घिमिरे तीनु तहके सरकारके समन्वय हुइपरनामे जोड डेले रहि । उहाँ संविधानमे करल समावेशी व्यवस्था कार्यान्वयन हुइल कलेसे फेन व्यवहारमे लागू नैहुइल बटैलि ।
कार्यक्रममे अनौपचारिक क्षेत्र सेवा केन्द्र (इन्सेक) के प्रदेश संयोजक खड्कराज जोशी प्रदेश सरकार कुछ ठाउँमे काम करलेसे फेन अभिनसम जनता संघीयतापाछे आइल प्रदेश सरकारके महसुस करे नैसेकल बटैलैं । उहाँ प्रदेश सरकार आवश्यकता पहिचान, अध्ययन अनुगमन कैके विकासके योजना नाने परनामे जोर डेलैं ।
ओस्टेक, फाया नेपालके शेरबहादुर बस्नेत जनता प्रदेश सरकारसे प्रणालीगत विकासके संरचना चाहल बटैलैं । उहाँ स्थानीय जनतासँग प्रदेश सरकार समन्वय कैके आघे बह्रेपरना आवश्यक रहल बटैलैं ।
कार्यक्रममे कैलाली बहुमुखी क्याम्पसके प्राध्यापक राजेन्द्रवीर चन्द, नेपाल पत्रकार महासंघ कैलालीके अध्यक्ष हिमालय जोशी, पत्रकार भावना जोशी, भीमबहादुर शाह, ईन्दु थारुलगायत मन्तव्य व्यक्त करले रहैं ।
बेसके कार्यकारी निर्देशक चुर्णबहादुर चौधरीके अध्यक्ष्यतामे हुइल कार्यक्रममे स्वागत पत्रकार कर्ण शाह करले रहैं । कार्यक्रमे सञ्चालन संस्थाके सुशील बस्नेत करले रहैं ।
