भौतिक उपस्थितिमे पठनपाठन करैना अनुमति
पहुरा समाचारदाता
धनगढी, २८ माघ । कैलालीके कैलारी गाउँपालिकासे गाउँपालिकाभर रहल विद्यालयमे भौतिक उपस्थितिमे पठनपाठन करैना अनुमति डेले बा ।
शुकके बैठल गाउँपालिकास्थित शिक्षा समितिके निर्णय अनुसार गाउँपालिकासे फागुन १ गतेसे सक्कु विद्यालयमे भौतिक उपस्थितिमे पठनपाठन करैना अनुमति डेहल हो । स्वास्थ्य सुरक्षाके मापदण्ड पालना कैके भौतिक उपस्थितिमे पठनपाठनके नियमित कार्यक्रम सञ्चालन करे पर्र्ना गाउँपालिकाके प्रमुख प्रशासकीय अधिकृत वीरबहादुर ऐर जनैले बाटै ।
टीसरा लहरके कोरोना सङ्क्रमण फैलल्पाछे गैल पुस मसान्तसे कैलाली जिल्लाभरके विद्यालयमे भौतिक उपस्थितिमे पठनपाठन स्थगित करल रहे । इन्टरनेटके पहुँच रहल क्षेत्रमे वैकल्पिक विधिसे पठनपाठनके कार्यक्रम हुइलेसे फेन इन्टरनेट नैरहल ग्रामीण क्षेत्रके विद्यार्थी एक महिनासे स्कुल जाइ नैपाइल रहिट । कोरोना सङ्क्रमण घट्टी गैल ओरसे एक महिनापाछे विद्यालयमे भौतिक उपस्थितिमे पठनपाठनके कार्यक्रम सञ्चालन करे लागल हो ।
