संविधानके परिधिमे रहिके जनताके काम करमः प्रदेश प्रमुख जोशी
पहुरा समाचारदाता
धनगढी, २८ माघ । सुदूरपश्चिम प्रदेशके प्रदेश प्रमुख देवराज जोशी संविधानके परिधिभित्तर रहिके जनता काम करना बटैले बटैं । ‘प्रदेश प्रमुख हुइलबाद जनताके आकांक्षा ढेर रहठ, शुकके रोज धनगढीमे पत्रकार भेटघाटमे उहाँ कलैं, ‘प्रदेश प्रमुखहे संविधान परिधि बनैले बा । ओहे अनुसार काम करेपरठ ।’
अपने जनतासंग प्रत्यक्ष रुपमे बैठ्के काम करल सम्झटि प्रदेश प्रमुख जोशी सबके सल्लाह सुझाव लेके आघे बह्रना बटैलैं । पत्रकार भेटघाट कार्यक्रममे प्रदेश प्रमुख जोशी अपन कमीकमजोरीहे सुधारके लाग सुझाव डेना पत्रकार समक्ष आग्रह करलैं ।
कार्यक्रममे पत्रकारहुक्रे प्रदेश प्र्रमुखहे विकासमे प्रदेश सरकारसंग समन्व करेपरना सुझाव डेलैं । ‘प्रदेश सरकारके अपन परिधि हुइ,’ पत्रकार चित्रांग थापा कलैं, ‘सब बस्तीमे बजेट पुगल नैपुगल बारेमे प्रदेश सरकारसंग समन्वयकारी भूमिका खेले सेकेपरठ ।’ उहाँ अपन पदके गरिमाहे बचाके प्रदेश प्रमुख काम करेपरनामे जोड डेलैं ।
ओस्टेक, पत्रकार मनमोहन स्वाँर प्रदेशके शान्तिसुरक्षामे प्रदेश प्रमुख सरकारसंग समन्वय करेपरना सुझाव डेलैं । ‘स्थानीय तहके निर्वाचन घोषणा करले बा,’ उहाँ कलैं, ‘ओम्ने दलसे उप्पर उठके प्रदेश प्रमुखसे शान्ति सुरक्षाके अवस्थाके बारेमे सरकारसंग समन्वय करेपरठ ।’
सहभागी पत्रकार प्रदेश प्रमुख यिहे प्रदेशके रहल ओरसे विवाद रहित काम कैके नमुना बन्न आवश्यक रहल बटैले रहैं ।
