एक महिनापाछे आजसे विद्यालय खुल्टी
पहुरा समाचारदाता
धनगढी, ०१ फागुन । पुस २९ गते बन्द हुइल विद्यालय आजसे खुल्ना बा ।
जिल्ला संकट व्यवस्थापन केन्द्र कैलालीसे माघ २६ गते करल वैठकमे फागुन १ गतेसे भौतिक उपस्थितीमे विद्यालय संचालन कैना सिफारिस करल रहे । जिल्ला संकट व्यवस्थापन केन्द्रके निर्णयमे विद्यालय, विश्वविद्यालय, कलेज, ट्युसन सेन्टर, तालिम लगायतके शैक्षिक संस्था सञ्चालनके हकमे कोभिड विरुद्धके खोप लगाइल सुनिश्चित करके २०७८ साल फागुन १ से स्वास्थ्य मापदण्ड अवलम्वन करके सञ्चालन करे सेक्ना कहल बा ।
१२ वर्षसे कम उमेर समूहके विद्यार्थीके हकमे सम्वन्धित विद्यालयसे उपयुक्त वैकल्पिक विधि अपनाई कक्षा सञ्चालन करे सेक्ना निर्णय हुइल जिल्ला प्रशासन कार्यालय कैलालीके सूचना अधिकृति शिवराज जोशी बटैलै ।
कोभिड विरुद्धके खोप लगाई छुटल १२ वर्ष उप्पर १८ वर्ष टरे उमेर समुहके विद्यार्थीहुकनके हकमे अविलम्व खोप लगैना व्यवस्था मिलैना सम्वन्धित स्थानीय तह, स्वास्थ्य कार्यालय ओ सम्वन्धित विद्यालयहे अनुरोध कैना कहल उहाँ बटैलै । ओस्टेक कैलालीके कैलारी गाउँपालिकासे गाउँपालिकाभर रहल विद्यालयमे भौतिक उपस्थितिमे पठनपाठन करैना अनुमति डेले बा ।
शुकके बैठल गाउँपालिकास्थित शिक्षा समितिके निर्णय अनुसार गाउँपालिकासे फागुन १ गतेसे सक्कु विद्यालयमे भौतिक उपस्थितिमे पठनपाठन करैना अनुमति डेहल हो । स्वास्थ्य सुरक्षाके मापदण्ड पालना कैके भौतिक उपस्थितिमे पठनपाठनके नियमित कार्यक्रम सञ्चालन करे परना गाउँपालिकाके प्रमुख प्रशासकीय अधिकृत वीरबहादुर ऐर जनैले बटै ।
टिसरा लहरके कोरोना संक्रमण फैलल्पाछे गैल पुस मसान्तसे कैलाली जिल्लाभरके विद्यालयमे भौतिक उपस्थितिमे पठनपाठन स्थगित करल रहे । इन्टरनेटके पहुँच रहल क्षेत्रमे वैकल्पिक विधिसे पठनपाठनके कार्यक्रम हुइलेसे फेन इन्टरनेट नैरहल ग्रामीण क्षेत्रके विद्यार्थी एक महिनासे स्कुल जाइ नैपाइल रहिट । कोरोना संक्रमण घट्टी गैल ओरसे एक महिनापाछे विद्यालयमे भौतिक उपस्थितिमे पठनपाठनके कार्यक्रम सञ्चालन करे लागल हो ।
सुदूरपश्चिम प्रदेशमे कोरोना भाइरसके टिसरा लहरके अवस्था हेरेबेर अब्बे संक्रमण दर घटटी गैल बा । सामाजिक विकास मन्त्रालय स्वास्थ्य निर्देशनालयके तथ्याङकमे कोरोना भाइरसके संक्रमण दर कम मने चोखैना दर बह्रल डेखल बा । सक्रमण दरकमी आइल ओ चोखैना दर बह्रलपाछे एक महिनासे बन्द विद्यालय हुइल रहे । मने इन्टरनेटके सुविधा रहल विद्यालय ओ विद्यार्थीहुकनहे भर्चुअल माध्यमसे पठनपाठन कैगिल रहे ।
जिल्ला संकट व्यवस्थापन केन्द्र कैलालीसे स्वास्थ्य सुरक्षाके मापदण्ड पालना कैके भौतिक उपस्थितिमे पठनपाठनके नियमित कार्यक्रम सञ्चालन सिफारिस करलपाछे आजसे विद्यालय संचालन कैना तयारी हुइल बा ।
का बा टे प्रदेशमे कोरोनाके अवस्था
सुदुरपश्चिम प्रदेशमे शुकके रोज एक हजार ६ हजार ७० जाने कोरोना भाइरसके सक्रिय संक्रमित रहल बटै । जेम्ने कैलालीमे सबसे ८ सय ५४ जाने रहल सामाजिक विकास मन्त्रालय स्वास्थ्य निर्देशनालयके तथ्याङकमे जनाइल बा । ओस्टेक कञ्चनपुरमे ३ सय २७ जाने, अछाम ओ बझाङमे ३१÷३१ जाने, डडेल्धुरामे ६३, डोटीमे ३७, बाजुरामे १ सय ३५ जाने, बैतडीमे १ सय ४७ जाने ओ दार्चुलामे ४५ जाने कोरोना भाइरसके सक्रिय संक्रमित रहल निर्देशनालय जनैले बा ।
सुदूरपश्चिममे कोरोनाके संक्रिय संक्रमित ओ मृतके अवस्था
प्रदेशमे कोरोना संक्रमणसे मृत्यु हुइल संख्याफे कैलालीमे सबसे ढेर रहल बा । यहाँ २ सय ६५ जानेक ज्यान गैल बा । कलेसे कञ्चनपुरमे २ सय ९, अछाममे २७, बैतडीमे २३, बझाङमे २७, बाजुरामे १८, (बाँकी २ पेजमे) डडेल्धुरामे २४, दार्चुलामे १४, डोटीमे १७ ओ अन्य ३ करके प्रदेशमे ६ सय २७ जानेक ज्यान जनागिल बा ।
अब्बेसम प्रदेशमे ४ लाख ९० हजार ५ सय ७६ जानेक कोरोना परिक्षण करेबेर ५९ हजार १ सय ४२ जनहनमे संक्रमण डेखल रहे । ओस्टेक प्रदेशमे टमान नाकासे भिटरल २ लाख १३ हजार ८ सय ४० जानेक एन्टीजेनसे परिक्षण करेबेर ७ हजार एक सय ५१ जनहनमे सक्रमण डेखल निर्देशनालय जनैले बा ।
प्रदेशमे संक्रमितके उमेर हेरेबेर २० से २९ बरसके सबसे ढेर रहल बटै जेम्ने महिला ४ हजार ४ सय ३३ ओ पुरुष ८ हजार ७ सय ४९ जाने रहल बटै । ओस्टेक ३० से ३९ बरस उमेर समुहकेफे महिला ३ हजार २ सय १४ ओ पुरुष ७ हजार ६ सय ४२ जाने बटै ।
सुदूरपश्चिम प्रदेशमे बालबालिकाफे ढेर जोखिममे परल विल्गाइल बटै । ० से ९ बरसके १ हजार ३ सय ८४ जाने बालबालिकामे कोरोना संक्रमण डेखल रहे । पुस ३० गतेक तथ्याङक हेरेबेर एन्टीजेन ओ आरटी पीसिआरके ३ सय ८३ जाने जनहनमे संक्रमण डेखल रहे । कलेसे सबसे उच्च माघ १० गते ६ सय ५२ जनहनमे संक्रमण डेखल रहे । ओकरपाछे संक्रमणदर घटटी गैल बा । अब्बेक संक्रमण दर हेरेबेर माघ २८ गते ४७ जनहनमे संक्रमण डेखल बा कलेसे ८८ जाने चोखाइल बटै ।
ओस्टेक करके देशभर २४ घण्टामे ४९१ जनहनमे कोरोना संक्रमण पुष्टि हुइल बा । स्वास्थ्य तथा जनसंख््या मन्त्रालयके अनुसार चार हजार २६० जानेक पीसीआर परीक्षण करेबेर ४९१ जनहनमे संक्रमण पुष्टि हुइल हो ।
उहे अवधिमे दुई हजार ३९४ जानेक एन्टीजेन परीक्षण करेबेर ३४५ जनहनमे संक्रमण पुष्टि हुइल बा ।
मन्त्रालयके अनुसार कुल छ हजार ६५४ जनहनमे परीक्षण करेबेर पीसीआर ओ एन्टीजेन करके ८३६ जनहनमे संक्रमण पुष्टि हुइल बा । उहे अवधिमे १८ सय २६ जाने सक्रमणमुक्त हुइल बटै । संक्रमण मुक्त हुइना दर ९६.१ प्रतिशत रहल मन्त्रालय जनैले बा ।
मन्त्रालयके अनुसार २४ घण्टामे चार जानेक मृत्यु हुइल बा । यी संगे मुलुकमे कोरोनासे मृत्यु हुइलके सख्या ११ हजार ८८२ पुगल बा । नेपालमे हाल २६ हजार १०२ जाने सक्रिय संक्रमित बटै ।
