टीकापुर नगरपालिकासे दूधके मूल्य निर्धारण

पहुरा समाचारदाता
टीकापुर, १ फागुन । टीकापुर नगरपालिकामे दूध ओ दुग्धजन्य पदार्थके मूल्य निर्धारण करल बा । टीकापुर नगरपालिकाके उपभोक्ता हित संरक्षण समितिसे दूधके मूल्य निर्धारण कैना गठन करल समितिसे शुकके मूल्य बह्रैना निर्णय करल हो ।

आब टीकापुरके बजारमे उपभोक्ता दूधके लाग प्रतिलिटर ७० रुपियाँ तिरे पर्ना बा कलेसे किसान फागुनसे सावनसम प्रतिलिटर ५९ रुपियाँ ओ भदौसे माघसम प्रतिलिटर ५८ रुपियाँ पैना बाटै ।

डेरी सञ्चालक खुद्रा मूल्यमे ११ से १२ रुपियाँ फाइदा पैना हुइल बाटै । इहीसे आघे किसान प्रतिलिटर ५४ रुपियाँमे बेच्ना, डेरी ११ रुपियाँ नाफा लेके उपभोक्ताहे ६५ रुपियाँमे बेच्टी आइल रहिट ।

डेरी व्यवसायी इहीसे आघे एकपक्षीय रूपमे दूधके खरिद मूल्य ६० रुपियाँ ओ बिक्री मूल्य ७५ रुपियाँ तोकलपाछे उपभोक्ता ओ किसान नगरपालिका गुहारल रहिट । किसानके उत्पादन लागत ओ कच्चा दूध खरिद बिक्रीमे डेरी व्यवसायीसे पैना मुनाफाहे हेरके मूल्य निर्धारण करल ओ उपभोक्ता फेन दुग्ध विकास संस्थानसे सस्तामे दूध पैना पशु सेवा शाखाका प्रमुख श्यामराज पाण्डे बटैलै ।

ओस्टके टीकापुरमे दूधके गुणस्तर फेन तोकल बा । दूधके गुणस्तर ४ प्रतिशत फ्याट, ८ प्रतिशत एसएनएफ हुुइ पर्ना ओ इ मापदण्ड पूरा हुइलेसे गैया ओ भँैसीनके दूध किनबेच करेबर मूल्यमे विभेद नैकरजैना पाण्डे बटैलै ।

बह्रल मूल्यअनुसार फागुन १ गतेसे दहीके अधिकतम खुद्रा मूल्य प्रतिलिटर १०० रुपियाँ, महीके ५० रुपियाँ, घिउ प्रतिकिलो एक हजार रुपियाँ, खुवा प्रतिकिलो ७०० रुपियाँ ओ छुर्पी प्रतिकेजी एक हजार रुपियाँ हुइल बा ।

पशुपालक किसानके प्रतिनिधि ललित थापा तोकल मूल्यसे किसानके लागत नैउठ्लेसे फेन उपभोक्ताहे ध्यानमे राखके समितिसे निर्धारण करल मूल्यमे चित्त बुझाइ परल बटैलै ।