झोलुंगे पुल नैहोके स्थानीयहे समस्या
बझाङ, १ फागुन । गैल कुँवारमे परल अविरल वर्षासँगे सेती लडियामे आइल बाढसे केदार स्युँ गाँउपालिका ओ थलारा गाँउपालिका जोर्ना झोलुंगे पुल पुहाइलपाछे यहाँके स्थानीयवासीहे समस्या परल बा ।
वर्षौँ पुरान झोलुंगे पुल बाढसे पुहाइलपाछे थलारा गाँउपालिकाके वडा नम्बर १ ओ २ के सक्कु गाँउ ओ डोटी जिल्लाके कुछ स्थानीयवासीहे समेत समस्या परल बा । थलाराके रेगम, पिपलकोट, चुथी, बगडा, मोरायल, खरायल, थापागाँउ, तेलिमाडु लगायत गाँउके स्थानीयहे सेती लडिया वारपार कैना समस्या हुइल बा ।
ओस्टके डोटीके सायल गाँउपालिका अन्तरगत पर्ना बनिया, छपाली, कौराडी, सिर्मा आदी गाँउके स्थानीय फेन इहे डगरा होके आपन कृषिजन्य उत्पादन देउरा बजारमे बिक्री कैटी आइल बाटै । मने पक्की पुल नैबनके यहाँके स्थानीयहे दुःख खेपे परल थलाराके स्थानीय देवराज जोशी बटैलै । ‘केदार स्युँमा काम विशेषसे हमार आवतजावत हुइटी रहठ्, मने झोलु·ेपुल पुहाइलपाछे ढिउर समस्या हुइल बा,’ उहाँ कहलै, ‘अब्बे गाँउले मिलके सेती लडियामे सामान्य काठेपुल टे निर्माण करले बााटी मने इ पुल फेन जोखिममे बा । कौन दिन महिला, बालबालीका सेती लडियामे पुहके जाइट कना चिन्ता सटैटी रहठ् ।’
इहे डगरा होके थलाराके टमान गाँउके झण्डे ९० जानेसे ढिउर बालबालिका केदार स्यँु गाँउपालिकामे रहल बेताल माविमे अध्यनरत बाटै । अब्बे टे जोखिम मोलके हुइलेसे फेन काठेपुलसे ओहोर दोहोर कैटी रहल रलेसे फेन लडियामे पानीके सतह बह्रलपाछे समस्या हुइना थलारा गाउँपालिका–१ के स्थानीय लालबहादुर बोहरा बटैलै ।
‘आब सेती लडियामे पानीके सतह बह्रटी किल अब्बेक काठे पुल पुहाइ, ओकरपाछे टे सक्कु बालबालिकाहुक्रनके विद्यालय जैना समस्या रही,’ उहाँ कहलै, ‘ओस्टके उपचारके लाग उपार देउरा बजार जैना करलमे पुल पुहैलेसे उ सुविधासे फेन वञ्चित हुइना डेखजाइठ् ।’ इ विषयमे थलारा गाँउपालिका वडा नम्बर १ के वडा अध्यक्ष धर्मराज भट्ट पालिकासे इ समस्या समाधानके लाग पहल कैटी रहल बटैलै ।
जिल्ला प्रशासन कार्यालयमे रहल विपद् व्यवस्थापन समितिके बैठकमार्फत प्रदेश ओ संघीय सरकारसँग पुल निर्माणके लाग बजेट माग करसेकल उहाँके कहाइ बा ।
