कर्मचारी भर्ना खोल्ना आयोगके तयारी

पहुरा समाचारदाता
धनगढी, ४ फागुन । सुदूरपश्चिम प्रदेश लोकसेवा आयोग प्रदेश सरकारसे माग होके आइलमे कर्मचारी भर्ना प्रकृया आघे बह्रैना तयारी करले बा ।

सरकारसे माग आकृति फाराम प्राप्त हुइटी किल भर्नाके प्रकृया सुरु करजैना आयोग जनैले बा । ‘माग आकृति फाराम आइलपाछे वार्षिक क्यालेन्डर बनाके कर्मचारी भर्नाके काम आघे बह्राब ।’ प्रदेश लोकसेवा आयोगके सचिव दुर्गादत्त बिष्ट कहलै, ‘कुछ पदामे भर्नाके लाग सक्कु तयारी पूरा करसेकल बाटी ।’ जौन पद वा समूहमे कर्मचारीके माग ढिउर बा उ पदपूर्तिहे प्राथमिकतामे राखके वार्षिक क्यालेन्डर निर्धारण करब ।’ तत्काल भर प्राविधिक ओरके चौथो ओ पाँचौँ तहके भर्नाहे प्राथमिकता डेना आयोग जनैले बा ।

प्राविधिक ओर चौथो ओ पाँचौँ तहके कर्मचारी भर्नाके लाग पाठ्यक्रम निर्माणसे आवश्यक सक्कु तयारी पूरा हुइल सचिव बिष्ट बटैलै । उहाँ सरकारसे माग करलमे आयोगसे इहे आर्थिक बरसमे भर्ना सुरु हुइना मेरके क्यालेन्डर बनैना बटैलै ।‘आयोगसे जौन तयारी पूरा करले बा अब्बे उहीहे प्राथमिकता डेबी ।’ उहाँ कहलै, ‘ढिउर कर्मचारी आवश्यक हुइल पदहे पहिले प्राथमिकता डेके औरे बरसके वार्षिक क्यालेन्डर बनाब ।’ अब्बे टमान तहके पाठ्यक्रम निर्माण करटी रहल आयोग जनैले बा ।

सुदूरपश्चिम प्रदेश सरकारसे प्रदेश संरचना निर्माणके समयमे केन्द्रसे निर्धारण करल दरबन्दीहे आधार मानके कर्मचारी भर्ना कैना निर्णय गत शुकके करल रहे । मन्त्रीपरिषद् बैठकसे रिक्त दरबन्दीमे कर्मचारी भर्ना प्रकृया सुरु कैना एक अँठ्वार भित्रे प्रदेश लोकसेवा आयोगहे कर्मचारी माग आकृति फाराम भरके पठैना निर्णय करल हो । सरकारसे कर्मचारी भर्नाके नीतिगत बाधा फुकैना निर्णय करलसँगे लोकसेवाहे कर्मचारी भर्ना कैना डगरा खुलल् बा । कर्मचारी भर्नाके लाग आवश्यक सक्कुु तयारी पूरा करसेकल लोकसेवा सरकारसे रिक्त दरबन्दीमे कर्मचारी माग नैकैके भर्ना खोले नैसेकल हो ।

सरकारके प्रवक्ता एवम् आन्तरिक मामिला तथा कानुन मन्त्री पूर्णा जोशी मन्त्रालय ओ मातहत निकायमे रिक्त दरबन्दीमे कुछ दिनभित्रे माग आकृति फारामसहित प्रदेश लोकसेवाहे अनुरोध कैके पठैना बटैली ।‘लोकसेवाहे कर्मचारी भर्ना कैना डगरा खुल्ना मेरके निर्णय कैले बाटी ।’ मन्त्री जोशी कहली, ‘लोकसेवाहे काम कैना प्रदेश सरकारस करे पर्र्ना काम हम्रे करले बाटी । लोकसेवाहे कर्मचारी भर्ना प्रकृया आघे बह्रैना डगरा प्रशस्त हुइल बा ।’ प्रदेशसे कर्मचारीके संगठन तथा व्यवस्थापन (ओएनएम) कैना बाँकी रहल ओरसे संघीय सरकारसे स्वीकृत करल दरबन्दीहे आधार मानके कर्मचारी पदपूर्ति कैना निर्णय हुइल उहाँ बटैली ।

प्रदेश संरचना निर्माणके क्रममे संघीय सरकारसे सुदूरपश्चिममे दुई हजार ३८० जाने कर्मचारीके दरबन्दी स्वीकृत करल रहे । संघसे निर्धारण करल दरबन्दीमे करिब ४५ प्रतिशत दरबन्दी रिक्त रहल बा । कर्मचारी समायोजन नैहुइना विशिष्ट श्रेणी प्रमुख सचिव, प्रथम श्रेणी सचिव ओ संघीय ऐनबमोजिम नेपाल सरकारसे पूर्ति हुइना पदबाहेकमे पदहे तह कायम कैके भर्ना खोल्न लोकसेवाहे आग्रह करजैना मुख्यमन्त्री तथा मन्त्रीपरिषद्के कार्यालय जनैले बा । प्रदेशमे रिक्त दरबन्दीमध्ये प्राविधिक ओरके कर्मचारी ढिउर बाटै । सरकारसे माग आपूर्ति फाराम भरके कर्मचारीके माग करलमे किल लोकसेवासे भर्ना प्रकृया आघे बह्रैना व्यवस्था रहल बा । आयोगके नियमावली, निर्देशिका तथा प्राविधिक ओरके चौथो ओ पाँचौ तहके पाठ्यक्रम निर्माण, परीक्षा दस्तुर निर्धारण, वेबसाइट तथा अनलाइन आवेदन डेना व्यवस्था आदि कर्मचारी भर्नाके सक्कु तयारी पूरा हुइल सचिव बिष्ट जानकारी डेलै ।

सरकारसे गैल बरस चैतमे प्रदेश लोकसेवा आयोग गठन करल रहे । गठन हुइल एक बरससम फेन आयोगसे कर्मचारी भर्ना सुरु नैहुइल कहटी आयोग ओ सरकारके आलोचना हुइटी आइल बा । प्रदेशमे दरबन्दीअनुसार कर्मचारी नैहोके प्रदेश सरकारसे कैना काम ओ सेवा प्रवाह प्रभावित हुइटी आइल बा । प्रदेशमे हरेक बरस पूँजीगत खर्च न्यून हुइना करल बा । सरकारसे बजेट खर्च कम हुइना ओ कामकारबाही सोँचलअनुसार प्रभावकारी नैहुइनामे कर्मचारी अभावके कारण डेखैना करल बा । कर्मचारी पदपूर्ति हुइलेसे सरकारके कामकारबाही थप प्रभावकारी हुइना अपेक्षा करल बा ।