कानून निर्माणके लाग मापदण्ड नैहो : मन्त्री जोशी
पहुरा समाचारदाता
धनगढी, ४ फागुन । कानून निर्माणके लाग संघीय सरकारसे कौनो फेन मापदण्ड निर्धारण नैकैडेहल ओरसे प्रदेश सरकारहे कानून निर्माणमे समस्या हुइल सुदूरपश्चिम प्रदेशके आन्तरिक मामिला तथा कानून मन्त्री पूर्णा जोशी बटैले बाटी ।
गैरसरकारी संस्था महासंघ नेपाल सुदूरपश्चिम प्रदेशसे मंगरके रोज धनगढीमे आयोजित नागरिक समाजसँग सम्बन्धित कानूनउपर नीति संवाद कार्यक्रमहे सम्बोधन कैटी मन्त्री जोशी ओइसीन बटाइल हुइट । मन्त्री जोशी कानून बनैना चुनौटीके बावजूद प्रदेश सरकारसे ५७ ठो कानून निर्माण कैसेकल ओ २ ठो कानून विचाराधिनमे रहल उल्लेख करली ।
यकर साथे उहाँ संघीय सरकारसे कानून निर्माणके लाग कुछ मापदण्ड निर्धारण कैडेसे आम नागरिकके जिवन सहज बनैना मेरके नागरिकमैत्री कानून निर्माण कैना फेन बटाइल रही ।
गैर सरकारी संस्था महासंघके केन्द्रीय अध्यक्ष रामप्रसाद सुवेदी नागरिक समाज लगायत संघ संगठनके सवालहे लेके नागरिकमैत्री कानून बनैना प्रदेश सरकारहे सुझाव डेहल रहिट ।
प्रदेश सभा सदस्य टेकबहादुर रैका प्रदेश सरकारसे बनाइल कानून कार्यान्वय कैना दौरानमे नागरिकहे समस्या परलेसे उ कानूनहे संसोधन कैना बटाइल रहिट । कार्यक्रममे प्रदेश सभा सदस्य अमर साउद कानूनी क्षेत्रमे स्वयत्तता नैरहल बटैलै ।
यहोर मुख्य न्यायधिवक्ता कुलानन्द पाध्याय फेन संघीय सरकारसे कानून बनैना कौनो आधार नै टोकल ओरसे कानून निर्माणमे समस्या हुइनाके साथे आवश्यक कानून लाने ओ कार्यान्वय करे नैसेकल बटाइल रहिट ।
कार्यक्रममे फाया नेपालके शेरबहादुर बस्नेत गैरसरकारी संघ संस्थाहे नियमन अनुगमन कैना एकठो छुट्टे निकाय आवश्यक रहल औंल्याइल रहिट ।
ओस्टके एनएनडब्ल्यूडिएसके चक्र विक गैर सरकारी संस्था नियमन व्यवस्थापन कैना ऐन हाली लाने पर्ना बटाइल रहिट ।
कार्यक्रममे गैरसकारी संस्था महासंघ नेपालके सचिव धर्मराज पाठक नागरिक सहभागिता तथा नागरिक संस्थाके कार्य वातावरणके दृष्टिसे सुदूरपश्चिम प्रदेश सरकारके नीति तथा कानूनके अध्ययन प्रतिवेदन प्रस्तुत करल रहिट । उहाँसे प्रस्तुत करल प्रतिवेदनमे संघीय, प्रदेश ओ स्थानीय निकायसे कानून निर्माण करेबर नागरिक समाज तथा नागरिक स्पेशके महत्व बुझ्ना मेरके संविधानके मर्म बमोजिम सक्कु कानूनमे नागरिक समाजके सहभागिताके सुनिश्चिता सहितके नागरिक समाजमैत्री कानून निर्माण करे पर्ना सुझाइल बा ।
कार्यक्रम गैर सरकारी संस्था महासंघ नेपाल सुदूरपश्चिम प्रदेशके अध्यक्ष देवी खनालके अध्यक्षतामे हुइल रहे । कार्यक्रममे स्वागत मनतब्य उपाध्यक्ष हिरा शाही करल रहिट कलेसे कार्यक्रमके सञ्चालन टेकराज पाण्डे करल रहिट ।
कार्यक्रममे नागरिक समाजके अगुवा, टमान संघ संगठनके पदाधिकारी, पत्रकार लगायतके उपस्थिति रहल रहे ।
