सुदूरपश्चिमके ५९९ विद्यालय छनोट
पहुरा समाचारदाता
धनगढी, ४ फागुन । राष्ट्रपति शैक्षिक सुधार कार्यक्रममे सुदूरपश्चिमके ५९९ विद्यालय छनोट हुइल बावै ।
सोम्मारके शिक्षा, विज्ञान तथा प्रविधि मन्त्री देवेन्द्र पौडेलके अध्यक्षतामे बैठल बैठकसे विद्यालय भवन निर्माण, प्राबिधिक ल्याब व्यवस्थापन लगायतके कामके लाग सुदूरपश्चिमके ५ सय ९९ विद्यालय सहित देशभरके ४ हजार १ सय ५७ सार्वजनिक विद्यालय छनोट करल हो ।
जौन मध्ये सुदूरपश्चिम प्रदेशमे १ सय ४१ विद्यालयमे ४ कोठे भवन, १ सय ७९ विद्यालयमे दुई कोठे भवन, २ सय ७० विद्यालयमे आइसीटी व्यवस्थापन, ८ विद्यालयमे प्राविधिक ल्याब ओ विद्यालयमे नयाँ प्राविधिकमे एक विद्यालय छनोट हुइल बावै ।
देशके ७ सय ३७ स्थानीय तहसे १३ हजार ४ सय ७३ विद्यालय प्रस्ताव पठाइल रहिट । जेम्ने ७ हजार ९ सय ८६ विद्यालय भवन निर्माण, ४ हजार २ सय ३५ विद्यालयसे आइसीटी ल्याब, १ सय १७ विद्यालय नयाँ प्राविधिक धार, प्राविधिक विद्यालय ल्याब व्यवस्थापन १ सय ८८ ओ घेराबार खेलमैदानमे ९४७ विद्यालय आवेदन डेहल रहिट ।
