मसुरिया स्वास्थ्य चौकीमे आँखा उपचार केन्द्र ओ फार्मेसी सेवा सञ्चालन
पहुरा समाचारदाता
मसुरिया, ५ फागुन । च्यारीटी हेल्थ फाउन्डेसन नेपाल ओ गौरीगंगा नगरपालिकाके साझेदारीमे मसुरिया स्वास्थ्य चौकीमे आँखा उपचार केन्द्र संञ्चालनमे आइल बा । केन्द्रके गौरीगंगा नगरपालिका प्रमुख भीमबहादुर देउवा ओ च्यारीटी हेल्थ फाउन्डेसन नेपालके अध्यक्ष विद्या प्रसाद पन्त केन्द्रके बिफेक रोज संयुक्त उदघाटन करले बटै ।
स्वास्थ्यके अभिन्न अंगके रुपमे आँखी महत्वपूर्ण रहल कहटी यी केन्द्रसे प्राथमिक उपचार हुइना ओ विशेषज्ञ सेवा प्रदान कैना च्यारीटी हेल्थ फाउन्डेसन नेपालसे समन्वय कैना अध्यक्ष विद्या प्रसाद पन्त आँखा उपचार केन्द्रके निरन्तरके साथ सहकार्य रहना प्रतिबद्धता व्यक्त करले बा ।
वडा नं ९ के अध्यक्ष एवं स्वास्थ्य चौकी व्यवस्थापन समितिके अध्यक्ष हरि प्रसाद तिवारी मसुरिया स्वास्थ्य चौकीमे नयाँ विधाके स्वास्थ्य सेवा थप करल कहटी स्वास्थ्य चौकीमे विशेषज्ञ सेवा प्रवाह कैना डाक्टरके दरबन्दी व्यवस्थापन कैना नगर प्रमुख भीम बहादुर देउवाके ध्यानाकर्षण कराइल रहे । स्वास्थ्य चौकी घेराबार ओ जग्गा निश्चित कैना नगरपालिकासे पहल करे पर्ना बटैले रहिट ।
उहे अवसरमे स्वास्थ्य चौकी फार्मेसी सेवाके समेत सुभारम्भ करल बा । फार्मेसीसे नेपाल सरकारसे उपलब्ध करैना औषधि निशुल्क ओ बजारमे किने पर्ना औषधि शुपथ मुल्यमे सेवाग्राहीसे खरिद करे पैना व्यवस्था मिलाइल बा ।
स्वास्थ्य सेवा प्रवाहो सुचाङकके दृष्टिसे मसुरिया स्वास्थ्य चौकी जिल्लामे उत्कृष्ट हुइल कहटी मसुरिया स्वास्थ्य चौकी प्रमुख लालप्रसाद पन्त आँखी उपचार सेवा प्रदानसंगे फार्मेसी सेवा नियमित रुपमे संचालन करे लागल बटैलै ।
