स्थानीय विकासमे पत्रकारिता क्षेत्रके भूमिका विषयक अभिमुखीकरण सुरु
पहुरा समाचारदाता
भजनी, ५ फागुन । स्थानीय विकासमे पत्रकारिता क्षेत्रके भूमिका ओ सूचनाके हक सम्बन्धी दुई दिवसिय अभिमुखीकरण कार्यक्रम सुरु हुइल बा ।
भजनी नगरपालिकाके सहकार्य तथा नेपाल पत्रकार महासंघ कैलालीके संयोजनमे अधिकारण कार्यक्रम हुइटी रहल बा । शुकसम चल्ना उ कार्यक्रमके वडका पहुना भजनी नगरपालिकाके प्रमुख प्रशासकीय अधिकृत धर्मराज विनाडी रहल रहिट ।
उद्घाटन कार्यक्रममे बोल्टी उहाँ संचार क्षेत्र समाजमे सुसुचित कैना माध्यम रहल बटैलै । कार्यक्रममे वरिष्ठ पत्रकार मनमोहन स्वाँर भजनी नगरपालिका पहिलेक तुलनामे ढेर विकास हुइल मने प्रचार प्रसार नइहुइल बटैलै ।
नेपाल प्रेस युनियन केन्द्रीय सदस्य जगत साउद भजनी नगरपालिकासे स्थानीय विकासमे पत्रकारिता क्षेत्रके भूमिका विषयक कार्यक्रम संचालनके लाग सहकार्य करडेलकमे धन्यावाद डेहल रहिट । कार्यक्रममे समाजवादी प्रेस संगठनके संस्थापक केन्द्रीय सदस्य मीन ठकुरी, प्रेस सेन्टरके प्रदेश वरिष्ठ उपाध्यक्ष पदम बोहरा लगायत शुभकामना व्यक्त करले रहिट ।
नेपाल पत्रकार महासघ कैलालीके अध्यक्ष हिमालय जोशीके अध्यक्षतामे हुइल कार्यक्रमके संचालन सचिव प्रेम चौधरी ओ स्वागत मन्तव्य कोषाध्यक्ष लक्ष्मी जैशी करले रहिट ।
कार्यक्रममे भजनी नगरपालिकाके टमान वडासे २५ जानेक सहभागिता रहल बा । दुई दिने अभिमुखीकरण कार्यक्रममे वरिष्ठ पत्रकार मनमोहन स्वाँर सहजीकरण करटी रहल बटै ।
