पेट्रोलियम पदार्थके मूल्य फेनसे बह्रल

काठमाडौं, ५ फागुन । नेपाल आयल निगम फेनसे पेट्रोलियम पदार्थके मूल्य बह्रैले बा । बुधके रात १२ बजेसे लागू हुइना मेरके प्रतिलिटर पेट्रोल ५.६१, डिजेल ५.६२ ओ हवाई इन्धन ४.९५ से बह्राइल निगम जनैले बा ।

निगमके अनुसार कच्चा तेलके मूल्य झण्डे अमेरिकी डलर ९० से ९६ प्रति व्यारेल पुगसेकल ओरसे ईण्डियन आयल कर्पोरेशन बुधके लावा मूल्य पठाइल जनैले बा । लावा मूल्य अनुसार निगमहे आगामी १५ दिनमे करीब दुइ अर्ब ४१ करोड घाटा हुइना स्थिति डेखाइल निगमके कहाइ बा ।

चालू आर्थिक बरसके माघ मसान्तसममे आयल निगमसे करीब २४ अर्व नोक्सानी बेहोर सेकल निगम जनैले बा । प्रति महिना निगमसे ४ अर्वसे ढिउर ऋण लेहे पर्ना बाध्यात्मक अवस्था रहल निगमके कहाइ बा ।