चौठा दिन होलिल्याण्ड ओ लिटल फलावर विजयी
पहुरा समाचारदाता
धनगढी, ५ फागुन । धनगढी मेयर लिटल फलावर प्रिमियर लिग विद्यालय स्तरीय अन्डर–१९ क्रिकेट प्रतियोगिता अन्तर्गत चौठा दिन सम्पन्न दुई ठो खेलमे होलिल्यान्ड इंगलिश स्कुल अत्तरिया ओ लिटल फलावर स्कुल धनगढी विजयी हुइल बटै ।
प्रहरी खेल मैदानमे सम्पन्न विफेक पहिल खेलमे होलिल्याण्ड इंगलिश स्कुल अत्तरिया शारदा सरस्वती स्कुलहे २ विकेटसे पराजित करल ।
होलिल्याण्डसे शारदा सरस्वती स्कुल, दोधारा चाँदनीहे २ विकेटसे पराजित करल । शारदा सरस्वतीसे डेहल ७५ रनके लक्ष्य होलिल्याण्डसे ८ विकेट क्षतिमे १६।२ ओभरमे भेटाइल ।
होलिल्याण्डके लाग अभिषेक पाल सर्वाधिक २२ रन तथा संजय बोहरा अविजित १० रन बनैलै । शारदा सरस्वतीके बलर हेमन्त धामी, गणेश बिटालु ओ विकास सुनार समान दुई विकेट लेलै ।
यी आघे टस जिटके ब्याटिंग रोजल शारदा सरस्वती १८।३ ओभरमे ७४ रनमे सक्कु विकेट गुमाइल रहे । ओकर लाग बिकास सुनार सर्वाधिक ११ रन तथा निरज तेज चन्द ओ मिलन बोहरा समान १० रन बनैलै । होलील्याण्डके बलर सन्जय बोहरा सर्वाधिक तीन विकेट तथा अवि नारायण कोइराला, गजेन्द्र बोहरा ओ श्याम साउद समान दुई विकेट लेलै । खेलके प्लेयर अफ द म्याच सन्जय बोहरा चुन्लै जे दुई हजार रुपैयाँ प्राप्त करलै ।
दुसरा खेलमे आयोजक लिटल फलावर स्कुलसे स्टेपिंग स्टोन धनगढीहे ७१ रनसे पराजित करल । लिटल फलावरसे डेहल १६३ रनके लक्ष्य पछ्यइना क्रममे स्टेपिंग स्टोनसे निर्धारित २० ओभरमे ७ विकेट क्षतिमे ९१ रन केल बनार्ए सेकल ।
स्टेपिंग स्टोनके ब्याटिंगमे आयुब चन्द सर्वाधिक ३२ रन तथा विशाल विष्ट ओ भुपेश जोशी समान १४ रन बनैलै । लिटल फलावरके बलर अनुराग सिंह दुई विकेट तथा प्रकाश जैसी, सुवास ऐयर ओ नरेन भट्ट समान एक विकेट लेलै ।
यी आघे टस हारके ब्याटिंग करल लिटल फलावरसे निर्धारित २० ओभरमे ८ विकेट क्षतिमे १६२ रन बनाइल रहे ।
लिटल फलावरके ब्याटिंगमे ओपनर सुवास ऐर सर्वाधिक ६७ रन बनैलै जौन क्रममे ८ चौका ओ ४ छक्का प्रहार करलै । ओस्टेक अनुराग सिंहसे १३ तथा अनिल थापा ओ पुस्कर बडु समान १२ रन बनैलै । स्टेपिंग स्टोनके बलर बिरेन्द्र चन्द ओ आयुब चन्द समान दुई विकेट तथा दिनेश ओड एक विकेट लेलै । खेलके प्लेयर अफ द म्याच सुवास ऐर घोषित हुइलै ।
प्रतियोगिता अन्तर्गत शुकके फे दुई खेल हुई । पहिल खेल बिहान ९ः३० बजे गुरुकुल ओ सत्यवती एकेडेमी तथा दुसरा खेलमे दुपहर १ः३० बजे सैनिक आवासीय ओ होलिल्याण्ड प्रतिस्पर्धा करही ।
प्रतियोगितामे १० बिद्यालय टिम सहभागी बटै । सहभागी टिमहे ‘ए’ ओ ‘बि’ करके दुई समुहमे बिभाजन करल बा । जौन अनुसार समूह ‘ए’ मे हिमालयन ह्वाइट हाउस वल्र्ड स्कुल काठ्माण्डौँ, सैनिक आवासीय महाविद्यालय तेघरी कैलाली, होली ल्यान्ड इङ्लिस बोर्डिङ स्कुल अत्तरिया, शारदा सरस्वती सेकेन्डरी दोधारा चाँदनी कञ्चनपुर ओ एभरेस्ट एकेडेमी अत्तरिया कैलाली रहल बटै । ओस्टेक करके समूह ‘बी’ मे आयोजक लिटल फलावर बोर्डिङ हाई स्कुल धनगढी, गुरुकुल इङ्लिस मिडियम स्कुल लम्की, स्टेपिङ स्टोन इङ्लिस बोर्डिङ स्कुल धनगढी, विद्या भूषण पब्लिक स्कुल धनगढी ओ सत्यवती एकेडेमी अत्तरिया रहल बटै ।
प्रतियोगिताके विजेता टिम १ लाख ५० हजार तथा उपविजेता ७५ हजार रुपैयाँ प्राप्त करही । ओस्टेक करके प्रतियोगिताो उत्कृस्ट खेलाडी २० हजार रुपैयाँ, उत्कृस्ट ब्याट्सम्यान ओ बलर समान १० हजार रुपैयाँ, प्रत्येक खेलके प्लेयर अफ द म्याच २ हजार रुपैयाँ, प्रत्येक खेलके गेम चेन्जर १ हजार रुपैयाँ तथा प्रत्येक खेलके सर्वाधिक छक्का प्रहार कैना खेलाडी ५०० रुपैयाँ प्राप्त करही ।
