सत्यवती ओ होलिल्याण्ड विजयी

पहुरा समाचारदाता
धनगढी, ६ फागुन । धनगढी मेयर लिटल फ्लावर प्रिमियर लिग अन्तर्गत शुकके रोज हुइल दुईठो खेलमे अत्तरियाके सत्यवती एकेडेमी ओ होलिल्याण्ड विजयी हुइल बा ।

पहिल खेलमे अत्तरियाके सत्यवती एकेडेमी लम्कीके गुरुकुल स्कुलहे १५४ रनके विशाल जित दर्ता करैले बा । टस जिटके ब्याटिङ करना निर्णय करल सत्यवती १९।४ ओभरमे सब विकेट गुमाके २ सय ९ रन बनाइल ।

ओकर लाग सन्तोष कार्की ओ सन्दीप खत्री आक्रामक पारी खेल्लैं । ३९ बलके सामना करल सन्तोष ८ छक्का ओ ५ चौकाके मद्दतमे ८० रन बनैलैं । सन्दीप खत्री १२ बलमे ६ छक्का ओ ४ चौकके मद्दतमे अर्धसतकीय आक्रामक पारी खेल्लैं । ओस्टेक, सुजन गौतम २७ बलमे ४५ रन बनैलैं । गुरुकुलके दिनेश अधिकारी, जानु कस्गर ओ विशाल विक्रम केसी समान २/२ विकेट लेलैं ।

२१० रनके विजयी लक्षसहित मैदान उत्रल गुरुकुलके कौनो ब्याट्सम्यानके प्रदर्शन सम्झन लायक नैरहल । ओकर लाग सिराज बागवान २६ तथा समीर राना १४ रन बनैना बाहेक अन्य ब्याट्सम्यान टिके नैसक्लैं । गुरुकुलहे सस्तैमे समोटल सत्यवतीके युवराज खत्री ३, आदील अन्सारी ओ सुजन गौतम समान २/२ तथा सन्दीप खत्री, नीरज भट्ट ओ सन्तोष कार्की १/१ विकेट लेलैं ।

खेलके प्लेयर अप दी म्याच घोषित हुइल सन्तोष कार्की सर्वाधिक छक्काके अवार्ड फेन पैलैं । गेम चेन्जर अवार्ड भर सन्दीप खत्री पैलैं ।
ओस्टेक, दोसर खेलमे सैनिक आवासीय महाविद्यालय तेघरी होलिल्याण्डसँग ५ विकेटले पराजित हुइल । टस जिटके ब्याटिङ करल सैनिक निर्धारित २० ओभरमे ७ विकेट गुमाके १ सय ५७ रन बनाइल ।

ओकर लाग खडक बोहरा ५ चौका ओ ४ छक्काके मद्दतमे ५१ बलके सामना करटि ६९ तथा प्रज्वल थापा ५१ बलमे ३ चौका ओ २ छक्काके मद्दतमे ५७ रन बनैलैं । अन्य ब्याट्सम्यानके प्रदर्शन कजा नैरहल । होलिल्याण्डके बलर जीत साउँ ३, सञ्जय बोहरा २ ओ अविनारायण कोइराला एक विकेट लेलैं ।

१ सय ५८ रनके विजयी लक्ष पछ्याइल होलिल्याण्ड १७.२ ओभरमे ६ विकेट गुमाके लक्ष्य पुगल । होलिल्याण्डके लाग दीपक टमाटा १८ बलमे ५ चौका ओ ४ छक्काके आक्रामक पारी खेल्टि ४९ रन बनैलैं । कृष्ण भट्ट ४२ बलमे नटआउट ४२, गजेन्द्र बोहरा २०, अविशेक पाल १९ ओ राज विश्वकर्मा १० रन बनैलैं । बलिङओर सैनिकके खडक बोहरा २ ओ गौतम केसी तथा हरिस धामी १/१ विकेट लेलैं ।

खेलके प्लेयर अफ दी म्याच होलिल्याण्डके कृष्ण भट्ट बन्लैं । गेम चेन्जर अवार्ड दीपक टमाटा पैलैं कलेसे सर्वाधिक छक्काके अवार्ड खडक बोहरा ओ दीपक टमाटा पैलैं ।

प्रतियोगिता अन्तर्गत काल्ह (शनिच्चरके रोज) पहिल खेलमे बिहान ९ः३० बजे काठमाडौंके हिमालयन ह्वाइट हाउस स्कुल ओ अत्तरियाका एभरेस्ट एकेडेमी आमनेसामने हुइ । ओस्टेक, दोसर खेलमे दिनके १ः३० से विद्याभुषण ओ गुरुकुल प्रतिस्पर्धा करहि ।