सुदूरपश्चिममे अभिन कोरोना एक हजार ६७ सक्रिय संक्रमित
कैलालीसे सबसे ढेर ६५१ जाने
पहुरा समाचारदाता
धनगढी, ७ फागुन । कोरोना भाइरसके टिसरा लहरके संक्रमण दरमे कमी अइलेसेफे सुदूरपश्चिम प्रदेशमे अभिनसम एक हजार ६७ जाने कोरोना भाइरसके सक्रिय संक्रमित रहल बटै ।
सामाजिक विकास मन्त्रालय स्वास्थ्य निर्देनालयके शनिच्चरसम तथ्याङकमे आरटी पीसिआरके १ सय २० ओ एन्टीजेनके ९ सय ४७ करके १ हजार ६७ जाने सक्रिय संक्रमित रहल जनागिल बा । जेम्ने कैलालीमे सबसे ढेर ६ सय ५१ जाने कोरोनाके सक्रिय संक्रमित बटै ।
ओस्टे करके कञ्चनपुरमे १ सय ७४, अछाममे २३, बैतडीमे ६८, बझाङमे २०, बाजुरामे ५१, डडेल्धुरामे ५३, दार्चुलामे १३ ओ डोटीमे १४ जाने सक्रिय संक्रमित रहल निर्देनालय जनैले बा ।
ओस्टेक स्वास्थ्य निर्देनालयके अनुसार पछिल्का २४ घण्टामे करल ९ सय ९७ जानेक कोरोना परिक्षणमे १८ जनहनमे संक्रमण पुष्टि हुइल बा । उहे अवधिमे १२ जाने चोखाइल बटै कलेसे एक जाने नवदुर्गा गाउँपालिका–१ डडेल्धुराके ८२ बरषके एक पुरुषके कोभिड संक्रमणके कारण उपचारके क्रममे डडेल्धुरा अस्पतालमे ज्यान गैल बा । यी संग्गे प्रदेशमे अभिनसम ज्यान गुमुइयाके संख्या ६ सय ३२ पुगल निर्देशनालय जनैले बा ।
शनिच्चरके रोज सुदूरपश्चिम प्रदेशके टमान नाकासे १ हजार २१ जाने नेपाल लौटल बटै कलेसे ओइनके एन्टीजेन करेबेर १२ जनहनमे कोरोना संक्रमण डेखल रहे । कञ्चनपुरके गडडाचौकीसे ४ सय ६५ जाने लौटेबेर ६ जनहनमे, कैलालीके गौरीफन्टासे ४ सय ९७ जाने लौटेबेर ५ ओ बैतडीके जुलाघाटसे ५९ जाने नेपाल लौटेबेर १ जनहनमे संक्रमण पुष्टि हुइल रहे ।
ओस्टेक पछिल्का २४ घण्टामे डेशभर ३५० जनहनमे कोरोना संक्रमण पुष्टि हुइल बा कलेसे चार जानेक मृत्यु हुइल बा ।
स्वास्थ्य तथा जनसंख्या मन्त्रालयके अनुसार तीन हजार ५३८ पीसीआर परीक्षणमे १९८ जाने ओ तीन हजार ५५८ एन्टिजेन परीक्षणमे १५२ जाने करके ३५० जनहनमे संक्रमण पुष्टि हुइल हो ।
पछिल्का २४ घण्टामे कोरोना संक्रमणके कारण ४ जानेक मृत्यु हुइल बा ।, ओस्टेक एक हजार २७२ जाने संक्रमणमुक्त हुइल बटै । हाल देशभर कोरोना भाइरसके सक्रिय संक्रमितके संख्या १३ हजार ३५७ रहल बा ।
