हिमालयन ह्वाइट हाउस ओ विद्याभुषण विजयी

पहुरा समाचारदाता
धनगढी, ७ फागुन । धनगढीमे जारी ‘धनगढी मेयर लिटल फ्लावर प्रिमियर लिग’ यु–१९ क्रिकेट प्रतियोगितामे हिमालयन ह्वाइट हाउस स्कुल काठमाण्डौँ ओ विद्याभुषण पब्लिक स्कुल गेटा विजयी हुइल बटै ।

धनगढीस्थित प्रदेश प्रहरीके खेल मैदानमे शनिच्चर हुइल पहिल खेलमे हिमालयन ह्वाइट हाउस स्कुलसे अत्तरियाके एभरेष्ट एकेडेमीहे पराजित करटी विजयी सुरुवात करल हो । हिमालयनसे अपन पहिल खेलमे एभरेस्टहे ८१ रनसे पराजित करटी पहिल जित दर्ता करले बा ।

टस जिटके ब्याटिङ कैना निर्णय करल हिमालयन ह्वाइट हाउससे २० ओभरमे ६ विकेट गुमाके १ सय ९१ रन बनाइल । १ सय ९२ रनके विजयी लक्ष पछ्याइल एभरेस्ट १९.३ ओभरमे अपन सक्कु विकेट गुमाके १ सय १० रन केल बनाई सेकल । एभरेष्टके सन्दीप विष्ट ३० बलमे २९, योगेश भाट १६ बलमे १९ ओ दीपक रोकाया १५ बलमे १३ रन बनैना बाहेक और ब्याट्सम्यानके प्रदर्शन सम्झन लायक नइरहल ।

हिमालयनके बलिङओर सन्दीप शाहीसे ३, राहुल भण्डारी ओ सतिस यादव २÷२, दीप बोहरा, नारायण जोशी ओ अनुप कुँवर १/१ विकेट लेलै ।
पहिल इनिङमे ह्वाइट हाउसके लाग वसन्त सिंह कार्की ७ चौका ओ ७ छक्काके मद्दतसे ४९ बलमे सर्वाधिक ९२ रनके सानदार पारी खेल्लै । ओस्टेक टिमके लाग दीपक बोहरा ३५ बलमे ४३ ओ राहुल भण्डारी १२ बलमे १२ रनके योगदान करलै । वसन्त ओ दीपक १ सय ३२ रनके साझेदारी पारी खेल्लै ।

एभरेष्टके बलिङमे धर्मराज जोशी ओ मुकेश ओझा ४ ओभर बलिङ करटी समान ३/३ विकेट लेलै । हिमालयनसे अपन पहिल खेलमे जित निकारेबेर एभरेष्टसे पहिल हार ब्यहोरल । खेलके प्लेयर अफ दी म्याच हिमालयन ह्वाइट हाउसके वसन्त कार्की घोषित हुके सर्वाधिक छक्काके अवार्डफे उहाँ पैलै । गेम चेन्जर अवार्ड राहुल भण्डारी पैलै ।

शनिच्चर हुइल दुसरा खेलमे विद्याभुषण पब्लिक स्कुलसे लम्कीके गुरुकुल स्कुलउप्पर ६ विकेटके जित निकारल बा । टस जिटके ब्याटिङ कैना निर्णय करल गुरुकुल एकेडेमी लम्की २० ओभरमे ९ विकेट गुमाके १ सय ४० रन बनाइल । १ सय ४१ रनके विजयी लक्ष पछ्याइल विद्याभुषणसे १७ बल बाँकी छरटी ४ विकेट गुमाके लक्ष्य भेट्टाइल । विद्याभुषणके लाग नरेन साउँद ७ छक्काके मद्दतसे ३२ बलमे सर्वाधिक ५६ रन बनैलै । ओकर वीरेन्द्र नाथ २९, प्रदीप चन्द २० रन बनाके आउट हुईबेर सुरेन्द्र ऐरी १५ रनमे नट आउट रहलै ।

गुरुकुलके बलिङओर दिनेश अधिकारी २, देव खनाल ओ बसिर अहमद समान १/१ विकेट लेलै ।

यी आघे पहिल इनिङमे गुरुकुलके लाग कप्तान देव खनाल ३ छक्का ओ १ चौकाके मद्दतसे ४४ बलमे ४७ रन बनाके आउट हुइलै । २९ बलके सामना करल बैठल अहमद ३ छक्का ओ २ चौका प्रहार करटी टिमके लाग ४१ रनके योगदान डेलै ।

विद्याभुषणके बलिङओर अर्जुन साउद ओ प्रवेश बुढ्थापासे २÷२ विकेट लेलै । शेर मल्ल, वीरेन्द्र नाथ ओ रोशन थापा समान १/१ विकेट लेलै ।
खेलके प्लेयर अफ दी म्याच नरेन साउद हुइलै । सर्वाधिक छक्काके अवार्डफे नरेन पाइबेर, गेम चेन्जर अवार्ड सुरेन्द्र ऐरी पैलै ।

प्रतियोगिता अन्तरगत आज अँटवार हुइना पहिल खेलमे सकारे ९ः३० बजे हिमालयन ह्वाइट हाउस स्कुल काठ्माण्डौँ ओ शारदा सरस्वती स्कुल दोधारा आमनेसामने हुइही । दुसरा खेलमे दुहपर १ः३० बजे आयोजक लिटल फ्लावर ओ विद्याभुषण भिरही ।

फागुन १४ गतेसम चल्न लिटल फ्लावर प्रिमियर लिगमे जारी संस्करणके विजेतासे १ लाख ५० हजार ओ उप–विजेता ७५ हजार नगदसहित ट्रफि, मेडल ओ प्रमाणपत्र प्राप्त करही ।