एलपीएल–६ः हिमालयन ह्वाइट हाउसके दुसरा जित

पहुरा समाचारदाता
धनगढी, ८ फागुन । धनगढी मेयर लिटल फलावर प्रिमियर लिग यु–१९ राष्ट्रिय क्रिकेट प्रतियोगितामे काडमाण्डौँके हिमालयन ह्वाइट हाउस स्कुल दुसरा जित निकरले बा ।

अँटवारके रोज हुइल पहिल खेलमे कञ्चनपुरके शारदा सरस्वती दोधाराउप्पर ७९ रनके सानदार जित निकरटी अपन दुसरा खेलमेफे विजयी हुइल हो ।

टस हारके ब्याटिङके निम्ता पाइल हिमालयन ह्वाइट हाउससे निर्धारित २० ओभरमे ७ विकेट गुमाके १ सय ७३ रन बनाइल रहे । १ सय ७४ रनके विजयी लक्ष पछ्याके जवाफी ब्याटिङ करल शारदाके कौनोफे ब्याट्सम्यान हिमालयनके बलर सामु टिके नइसेक्लै । उ १७।५ ओभरमे अपन सक्कु विकेट गुमाके ९४ रन केल बनाई सेकल । शारदाके मिलन बोहरासे १९, गणेश बिटालुसे १४ ओ सागर चन्दसे ११ रन बनैना बाहेक अन्य ब्याट्सम्यानसे दोहरो अंक छुई नइसेक्लै ।

शारदाहे सस्तामे समेट्न हिमालयनके राहुल भण्डारी महत्वपूर्ण ४ विकेट लेलै । सन्दीप शाह २, अनुप कुँवर, सन्दीप शाही, नारायण जोशी ओ दीपक बोहरा १/१ विकेट लेलै ।

यी आघे हिमालयनके लाग दीपक बोराके जोडी ५० रनके साझेदारी करटी टिमहे मजा सुरुवात डेहुवाइल रहिट । दीपक बोहरा सिनियरे ३० बलमे ५ चौका ओ २ छक्काके मद्दतसे ४८ रन बनैलै । दुसर दीपकसे २० बलके सामना करटी ३ चौका ओ १ छक्काके मद्दतमे ३१ रन बनाके आउट हुइलै । हिमालयनके लाग राहुल भण्डारी २ छक्का ओ २ चौकासहित ३० बलमे ४० रनके पारी खेलेबेर, वसन्त कार्की २० ओ अनुप कुँवर १७ रन बनैलै ।

शारदाके लाग बलिङओर मिलन बोहरा ओ अर्जुन सिंह साउद समान २/२ तथा गणेश बिटालु, प्रेम थापा ओ विकास सुनारसे १/१ विकेट लेलै ।
खेलके प्लेयर अफ दी म्याच अलराउण्ड प्रदर्शन करल राहुल भण्डारी घोषित हुईबेर गेम चेन्जर अवार्डफे उहे पैलै । सर्वाधिक छक्काके अवार्ड भर दीपक बोहरा सिनियर, राहुल भण्डारी, वसन्त कार्की ओ अनुप कुँवर पैलै ।

आजु दुसरा खेलमे आयोजक लिटल फलावर ओ विद्या भूषण प्रतिस्पर्धा करटी बटै ।