एमसीसी टेबुल पाछे राष्ट्रिय जनमोर्चासे विरोध

पहुरा समाचारदाता
धनगढी, ८ फागुन । अमेरिकी सहयोग परियोजना एमसीसी अनुमोदनके प्रस्ताव प्रतिनिधि सभामे पेश हुइलपाछे चौतर्फी विरोध सुरु हुइल बा । अँट्वारके एमसीसी प्रतिनिधिसभामे टेबल हुइल बा । सरकारके ओरसे सञ्चारमन्त्री ज्ञानेन्द्रबहादुर कार्की उ सम्झौता अनुमोदनके लाग प्रतिनिधिसभाके बैठकमे टेबल करल रहिट ।

प्रमुख प्रतिपक्षी दल ओ सत्तारुढ दलके विरोधके बीच एमसीसी संसदमे टेबल हुइल हो । विरोधके बीच एमसीसी संसदमे टेबल हुइलपाछे टमान पार्टीके युवा संघ तथा संगठन सडकमे उत्रल बाटै । ओस्टके सत्तारुढ दल राष्ट्रिय जनमोर्चा फेन धनगढीमे उक्त सम्झौताके विरोध करले बा । जनमोर्चाके केन्द्रीय महासचिव मनोज भट्ट अपनहे एमसीसीके विरोधमे सडकमे उत्रल हुइट ।

राष्ट्रिय जनमोर्चाके नेता तथा कार्यकर्ता कैलालीके जिल्ला प्रशासन कार्यालय फेन घेराउ करल रहिट । उहीसे आघे विद्यार्थी फेन विरोध करल रहिट । विरोध प्रदर्शन कैटी उहाँहुक्रे जिल्ला प्रशासन कार्यालय आघ नारावाजी फेन करल रहिट । एमसीसी खारेज कैना माग कैटी उहाँहुक्रे विरोध कैटी रहल बटैले बाटै ।