हिमालयन ह्वाइट हाउस ओ विद्या भूषण विजयी

पहुरा समाचारदाता
धनगढी, ८ फागुन । धनगढी मेयर लिटल फ्लावर प्रिमियर लिग यु–१९ राष्ट्रिय क्रिकेट प्रतियोगिता अन्तर्गत अँट्वारके हुइल दुई खेलमे काठ्माडौँके हिमालयन ह्वाइट हाउस स्कुल ओ विद्या भूषण गेटा विजयी हुइल बावै ।

पहिल खेलमे काठ्माण्डौँके हिमालयन ह्वाइट हाउस स्कुल कञ्चनपुरके शारदा सरस्वती दोधाराहे ७९ रनके सानदार जित निकारल रहे । टस हारके ब्याटिङके पाइल हिमालयन ह्वाइट हाउस निर्धारित २० ओभरमे ७ विकेट गुमाके १ सय ७३ रन बनाइल रहे । १ सय ७४ रनके विजयी लक्ष पछ्याइल जवाफी ब्याटिङ करल शारदाके कौनो फेन ब्याट्सम्यान हिमालयनके बलर सामु टिके नैसेकल । उ १७.५ ओभरमे आपन सक्कु विकेट गुमाके ९४ रन किल बनाइ सेकल । शारदाके मिलन बोहरा १९, गणेश बिटालु १४ ओ सागर चन्द ११ रन बनैना बाहेक अन्य ब्याट्सम्यान दोहरो अंक छुये नैसेक्लै ।

शारदाहे सस्तामे समेटक लाग हिमालयनके राहुल भण्डारी महत्वपूर्ण ४ विकेट लेहल रहिट । सन्दीप शाह २, अनुप कुँवर, सन्दीप शाही, नारायण जोशी ओ दीपक बोहरा १/१ विकेट लेहल रहिट । इहीसे आघे हिमालयनके लाग दीपक बोराके जोडी ५० रनके साझेदारी कैटी टीमहे मजा सुरुवात डेहुवाइल रहिट । दीपक बोहरा (सिनियर) ३० बलमे ५ चौका ओ २ छक्काके मद्दतसे ४८ रन बनाइल रहिट । औरे दीपक २० बलके सामना कैटी ३ चौका ओ १ छक्काके मद्दतमे ३१ रन बनाके आउट हुइल रहिट । हिमालयनके लाग राहुल भण्डारी २ छक्का ओ २ चौकासहित ३० बलमे ४० रनके पारी खेलेबर, वसन्त कार्की २० ओ अनुप कुँवर १७ रन बनाइल रहिट ।

शारदाके लाग बलिङ ओर मिलन बोहरा ओ अर्जुन सिंह साउद समान २÷२ तथा गणेश बिटालु, प्रेम थापा ओ विकास सुनार १÷१ विकेट लेहल रहिट ।

खेलके प्लेयर अफ दी म्याच अलराउण्ड प्रदर्शन करल राहुल भण्डारी घोषित हुइबर गेम चेन्जर अवार्ड फेन उहे पाइल रहिट । सर्वाधिक छक्काके अवार्ड भर दीपक बोहरा सिनियर, राहुल भण्डारी, वसन्त कार्की ओ अनुप कुँवर पाइल रहिट ।

डुसरा खेलमे विद्या भूषण पब्लिक स्कुलसे आयोजक लिटल फ्लावरहे ५५ रनसे पराजित करल रहे । टस जितके ब्याटिङ कैना निर्णय करल विद्या भूषणसे निर्धारित २० ओभरमे ८ विकेट गुमाके १ सय ४३ रन बनाइल रहे । १ सय ४४ रनके विजयी लक्ष पछ्याइल लिटल फ्लावरके कौनो फेन ब्याट्सम्यान सम्झना लायक प्रदर्शन करे नैसेकल रहिट । उ १७.६ ओभरमे अल आउट हुइटी ८८ रन किल बनाइ सेकल । टीमके लाग विपिन रावल ३३ बलमे ३० रन बनाइबर नरेन भट्ट १९ ओ प्रकाश जैशी १५ रन बनाके आउट हुइलै । बलिङ ओर विद्या भूषणके कप्तान शेर मल्ल ४, प्रदीप चन्द ३, अर्जुन साउद, वीरेन्द्र नाथ ओ नरेन साउद १/१ विकेट लेहल रहिट ।

उहीसे आघे विद्या भूषणके लाग वीरेन्द्र नाथ २६ बलमे ३४, प्रदीप चन्द २३ बलमे ३०, सुरेन्द्र ऐरी १७, नरेन साउद १४ ओ कप्तान शेर मल्ल १० रन बनाके आउट हुइल रहिट । बलिङ ओर लिटल फ्लावरके पुष्कर बडु कसिलो बलिङ कैटी ३ ओभरमे ३ विकेट लेके १९ रन डेहल रहिट । प्रकाश जैशी २, सुवास ऐर ओ नरेन भट्ट १/१ विकेट लेहल रहिट । खेलके प्लेयर अफ दी म्याच प्रदीप चन्द चुनल रहिट । सर्वाधिक छक्काके अवार्ड प्रदीप चन्द ओ वीरेन्द्र नाथ पाइबर गेम चेन्जर अवार्ड फेन वीरेन्द्र नाथ पाइल रहिट ।

प्रतियोगिता अन्तरगत सोम्मारके पहिल खेलमे एभरेस्ट एकेडेमी ओ शारदा सरस्वती तथा डुसरा खेलमे सैनिक आवासीय ओ हिमालयन ह्वाइट हाउस प्रतिस्पर्धा कैना बाटै । लिटल फ्लावरके जारी संस्करणके उपाधि जिटुइया टीम १ लाख ५० हजार ओ उप विजेता ७५ हजार पुरस्कार पैना बाटै ।