खप्तडमे पर्यटकके चहलपहल बह्रल
पहुरा समाचारदाता
धनगढी, ८ फागुन । कोरोनाके कारण झण्डे लम्मा समय पाछे पर्यटकके चहलपहल शून्य रहल खप्तडमे अब्बे पर्यटकके चहलपहल बह्रल पाइल बा । गत फागुन १ गतेसे सुरु हुइल ’हेलि टुर’के कारण सुदूरपश्चिमके प्रमुख पर्यटकीय गन्तव्यके रूपमे रहल खप्तडमे पर्यटकके चहलपहल बह्रल हो ।
नेपाल पर्यटन बोर्डके प्रवर्द्धनमे सुदूरपश्चिमके बडिमालिका क्षेत्रके प्रवर्द्धनके लाग फागुन १ गतेसे ’हेलि टुर’ आयोजना हुइटी रहल बा । आर्थिक विकासके लाग आन्तरिक पर्यटनहे चलायमान बनैना आवश्यक रहल कहटी कोरोनासे सुस्ताइल पर्यटनहे चलायमान बनैना इ ’हेलि टुर’के आयोजना करल नेपाल एशोसिएसन अफ टुर एण्ड ट्राभल एजेन्ट्स (नाटा) सुदूरपश्चिम जनैले बा ।
बोर्डसँगे सुदूरपश्चिम प्रदेश सरकार ओ खप्तड राष्ट्रिय निकुञ्ज प्रवद्र्धक तथा नेपाल एशोसिएसन अफ टुर एण्ड ट्राभल एजेन्ट्स (नाटा) सुदूरपश्चिम प्रदेश, माउण्टेन हेलिकप्टर ओ उद्योग वाणिज्य महासंघ, सुदूरपश्चिम तथा होटेल व्यवसायी महासंघ सुदूरपश्चिमके सहकार्यमे टुर आयोजना हुइटी रहल बा ।
कुछ दिन आघे किल खप्तड बडिमालिका हेलिटुरमे सुदूरपश्चिम प्रदेश सरकारके मन्त्री लगायत खप्तडके भ्रमण करले बाटै । प्रदेशके अर्थमन्त्री तारालामा तामाङ ओ भौतिक पूर्वाधार मन्त्री दीर्घ सोराडी भ्रमण करल रहिट ।
१० दिनमे कम्तीमे फेन ३५० जाने आन्तरिक पर्यटकहे खप्तड ओ बडिमालिका भ्रमण अवलोकन करैना नाटा सुदूरपश्चिमके लक्ष्य रहल बा ।
पहिल चरणमे टमान प्याकेजसहित खप्तड दिपायल, झिग्राना खप्तड, धनगढी ओ महेन्द्रनगरसे झिग्राना, दिपायल बडिमालिका, दिपायल खप्तड बडिमालिका ओ साँफेबगर बडिमालिका लगायत स्थानसे अवलोकन करे जैना व्यवस्था मिलाइल खप्तड होमस्टे झिग्राना तथा खप्तड एडभेन्चर टुर्सके प्रबन्ध निर्देशक दीपकबहादुर खड्का बटैलै ।
स्थानके हिसाबसे १२ हजारसे ४० हजारसमके प्याकेज उपलब्ध कराइल बा । खप्तड डोटी, अछाम, बझाङ ओ बाजुराके संगम स्थलके रूपमे रहल बा । यहाँ बरसमे ६ महिना हिउँले ढक्ना करठ् । अब्बे हिउँके कारण खप्तडके दृश्य मनमोहक रहल बा । खप्तडमे रहल २२ पाटन हिउँले ढपक्क ढाकके अप्सरा जस्टे डेखल बावै ।
खप्तडमे आभिन हिउँ करिब चार पाँच फिट जत्रा रहल बा । बडिमालिकामे समेत हेली टुर सञ्चालन कैना कलेसे फेन जोरसे परल हिउँके कारण हेलिकप्टर बैठे नैसेकके पर्यटक हेलीकप्टर मार्फत बडिमालिकाके दृश्यावलोकन कैके घुम्टी रहल बाटै ।
