लाइट टावरमे नेपाली झण्डा फहराइल

पहुरा समाचारदाता
धनगढी, ९ फागुन । सुदूरपश्चिम प्रदेशके धनगढी उपमहानगरपालिका–८ क्याम्पस रोड गुरही चोकमे बनल लाइट टावरमे नेपालके राष्ट्रिय झण्डा धारल बा ।

धनगढी उपमहानगरपालिकाके लगानी ओ वडा कार्यालयके सहकार्यमे प्रदेश पहिल बनल चो बनल ढेङ लाइट टावरमे भण्डोत्तोलन प्रदेश प्रमुख देवराज जोशी करले रहिट । भण्डोत्तोलन कार्यक्रममे बोल्टी उहाँ यी कार्य सार्वजनिक महत्व ओ राष्ट्रिय गौरवके विषय, प्रदेशके महत्वके विषय रहल बटैलै । यी कार्य औरफे वडामे करलेसे झन मजा हुइना उहाँ बटैलै ।

धनगढी उपहानगरपालिकाके नगर प्रमुख नृप बहादुर वड लाइट टावरके धनगढीके सात ठाँउमे स्थापना करेक लाग सर्वे हुइटी रहल बटैलै । उहाँ कहलै, क्याम्पस रोडमे स्थापना करल पहिल हो, टमान चोकमे स्थापना कैना उद्देश्य रहल हो, जौन चोकमे चार ठो सडक मिलल रही उहे ठाँउमे लाइट टावर स्थापना कैजाई । यकरपाछे ट्राफिक चौराहामे कैना तयारी हुइटी बा,’ नगर प्रमुख वड कहलै, यीसंगे मेनरोडके पार्कमोड प्रदेश भवन लग्गे, रातोपुलमे, सहिद गेट ओ एक ठो फुलवारीमेफे स्थापना कैबी । ओस्टेक करके धनगढी उपमहानगरपालिका–७ वडा कार्यालय लग्गेफे लाइट टावर स्थापना कैना नगर प्रमुख वड बटैलै ।

धनगढी उपहानगरपालिकाके नगर उप प्रमुख शुशिला मिश्रभट्ट अन्धारमे कोईफे बैठे नपरे कहटी लाईट टवारके स्थापना करल बटैलै । कार्यक्रममे वडा नम्बर ८ के अध्यक्ष नारायण बराल वडामे लाइट टावर स्थापनाके सहयोग करुइया सक्कुहु धन्यावाद ज्ञापन करल रहिट । लाइट टावरमे नेपालके राष्ट्रिय झण्डा धरना कार्यक्रममे नगरपालिकाके प्रमुख प्रशासकीय अधिकृत रामलाल श्रेष्ठ, समाजसेवीहुकनके सहभागिता रहे । ५६ फिट ढेङ रहल लाईट टावर २ लाख ७५ हजार लागतमे बनल वडा अध्यक्ष नारायण बराल बटैलै । लाइट टावरमे नेपालके राष्ट्रिय झण्डा धरना कार्यक्रमके संचालन टंक विष्ट करले रहिट ।